El Bloque propón aforrar 2’5 millones d'euros na Xunta Xeneral

El Bloque por Asturies propunxo la supresión d’asignaciones económiques a los grupos parllamentarios de la Xunta Xeneral, una midía qu’aforraría 2’5 millones d’euros. Los nacionalistes tamién criticaron los embolsos de PSOE, PP y IU.

En rueda de prensa na Xunta Xeneral, el Diputáu del Bloque por Asturies, Roberto Colunga, y el Portavoz Nacional, Rafael Palacios, esixeron la supresión d’asignaciones económiques a los Grupos Parllamentarios y la garantía de que toos estos grupos tengan los espacios físicos y los materiales y personal necesariu pa desendolcar el so llabor.

“Cómo ye posible que quienes piden sacrificios a la ciudadanía, aprueben una brutal reforma llaboral, conxelen pensiones y reducen sueldos, atrévense a embolsase 1 millón d’euros al añu del Parllamentu asturianu”, entrugó Rafa Palacios n’alusión al PSOE, que tien una asignación económica mensual de 83.235´82 euros al mes.

L’asignación del PP ye de 80.923´71 euros al mes, la d’IX-LV de  41.617´84 euros y la del BA, dende agostu, de 3.500´11 euros. Nesi sen tamién criticaron qu’IX aprobara la Llei d’Axuste como rempuesta a la crisis, mentantu s’embolsa abondes perres públiques, y que’l PP proponga “acabar colo público y criticar a los sindicatos polos lliberaos”.

Puesta en marcha
Esta propuesta anticrisis del Bloque por Asturies va presentala Roberto Colunga, diputáu y portavoz del Grupu Parllamentariu Mestu, al traviés d’un escritu a la presidenta de la cámara. El diputáu calificó de “intolerable” les asignaciones y espera que la so propuesta s’adopte por “unanimidá y ensin nengún tipu de problemes”.