Colunga presenta una Proposición en respuesta a les midíes de Fomentu

Roberto Colunga, diputáu del BA y Portavoz del Grupu Parllamentariu Mestu, presentó con carácter d’urxencia una Proposición Non de Llei na Xunta Xeneral pa qu’esta dea una respuesta unitaria a les “agresiones” del Gobiernu español.

Esta Proposición Non de Llei con carácter d’urxencia, tien l’oxetivu d’abrir un debate parllamentariu qu’inste al Conseyu de Gobiernu a dirixise al Gobiernu d’España pa esixi-y la financiación adecuada y un calendariu completu, con feches y plazos, pa la conclusión de toles infraestructures asturianes.

“Los permanentes anuncios en rellación a les infraestructures asturianes, que nunca se concreten en feches nin en plazos, nun son más que cortines de fumu pa esconder la falta de compromisu con Asturies”, criticó Roberto Colunga, que na Esposición de Motivos de la Proposición Non de Llei calificó l’actitú del Ministru de Fomentu español d”intolerable” y de “falta de respetu” pa con Asturies.

Unidá con urxencia
Dende’l Bloque por Asturies ven necesariu que “toles fuerces polítiques den una rempuesta conxunta y unitaria” a los recortes, supresión de financiación, retrasos y demás medíes anunciaes “permanentemente” dende’l Gobiernu español. Amás, consideren urxente’l debate parllamentariu de la Proposición Non de Llei, por mor de “l’acumulación de retrasos, la inesistencia de calendariu y la pérdida d’empleu”.