SUATEA denuncia que la llingua ta “fuera de llei” na enseñanza

El sindicatu d’enseñanza SUATEA califica nun comunicáu de “Fuera de la Llei” la situación del asturianu na enseñanza. Denuncia que nun se cumple la Llei d’Usu en cuantes a la ufierta de l’asignatura y la precaria situación del profesoráu.

Educación Infantil, Secundaria y Bachilleratu, son les tres estayes educatives onde l’asturianu tien una presencia más ruina. N’Educación Infantil, señalen dende SUATEA que la mayoría de los centros nun ufiertaron l’asignatura. “Munchos centros solicitaron ufiertar estes enseñances y dende’l Serviciu Inspección, cola supervisión del conseyeru, denegóse esta petición”, denuncien.

Tamién espón el sindicatu que solo’l 12 % del alumnáu d’Infantil recibía’l cursu pasáu clases de Llingua o Gallego-Asturiano y namás que’l 18% en Secundaria y Bachilleratu. Equí xuega un papel clave la competencia con otres materies; l’asturianu ye, amás de voluntaria, asignatura optativa, contraviniendo esti últimu aspectu l’artículu 10 de la Llei d’Usu y Promoción.

Precariedá llaboral
La precariedá tamién afuega a la llingua. Baxaron 16 places de profesoráu d’asturianu en Primaria y cerca del 50% son a media xornada y en Secundaria y Bachilleratu namás que 18 places son a xornada completa; el 71% son a media xornada. “Estos retayos en personal tradúcense na merma de la calidá de la enseñanza”, defende SUATEA, que tamién denuncia “la elimininación de l’atención al alumnáu d’Infantil”.