UNA critica la política de vivienda d’Izquierda Xunida

Unidá Nacionalista Asturiana vien de criticar les polítiques de Noemí Martín, Conseyera de Vivienda, na xestión d’esta materia materia. Según los nacionalistes “l’anunciáu axuste del preciu de la vivienda nun se produxo n’Asturies”.

Daniel Fernández, voceru de vivienda d’UNA, denunció, en base a los datos del INE, que’l preciu actual de la vivienda yá ye superior al del entamu de la crisis inmobiliaria. Amás, señaló que “mentantu la vivienda baxó 8’5 puntos a nivel estatal, n’Asturies xubió 0’5 puntos dende’l 2007”, polo qu’argumenta que nun se dio l’axuste de preciu.

“La política de vivienda d'IX ta empobinada a caltener el preciu del stock de viviendes de promotores y constructores, ensin ver la más mínima rectificación”, espón Fernández en crítiques al llabor del gobiernu. “Les polítiques de vivienda tienen de superar la fase de subvencionar a los ciudadanos pa que puedan pagar unos precios abusivos”, planteó’l nacionalista, que propuso la intervención “pa baxar el preciu de los pisos”.

14.295’06 euros más caro
Dende UNA tamién criticaron que la “nefasta evolución” del mercáu de la vivienda n’Asturies y que la xestión d’IX y de Noemí Martín  fai que los asturianos tengan que pagar 14.295,06 euros más de media na compra d’hogares.

A la contra d’esto, Daniel Fernández defendió que’l “gobiernu asturianu tien d'apostar decididamente por una política pa sacar al mercáu tanto la vivienda ensin usar como'l suelu urbanizable ensin construyir nos núcleos urbanos” y escaecese de “los guetos de mileurista na rodiada de les ciudaes”.