Misiva presenta’l discu so debú “Parte de la solución”

Yá ta na cai la primer referencia discográfica de Misiva, una de les nueves bandes de rock n’asturianu. A ritmu punk-rock, con mensaxe reivindicativu y protagonismu compartíu del asturianu y castellanu, asoleya “Parte de la solución”.

Misiva naz en Grau a finales de 2007, pero nun ye hasta primeros del 2009 cuando se presenten énte’l públicu asturianu con una maqueta autoeditada. El so soníu aportó aire nuevo a la escena rock n’asturianu y el recibimientu de crítica y públicu nun podía ser meyor: ganadores de los concursos de maquetes CISLAN y Llanera Suena 09 y finalistes nel Premiu al Meyor Cantar de la Conseyería de Cultura del Principáu d’Asturies.

Anguaño presenten “Parte de la solución”, el so primer llarga duración. Nesti trabayu, formáu por diez temes, síguese la llínia marcada pola banda, anque “pue notase un soníu más curiáu y más potente”, como declara a ASTURIES.COM Oscar González, guitarrista del grupu. Asina ye como un punk-rock na onda de bandes como Rise Against, Bad Religion o Pennywise; y unos testos billingües y reivindicativos caractericen a Misiva.

“Queremos convidar a la xente a que reflexone sobre los problemes qu’hai na nuesa sociedá y que tomen conciencia de qu’ellos son la llave pa cambiar les coses. Somos parte del problema pero somos parte de la solución”, apunta González sobre’l títulu d’esti discu. Algamar Producciones ye’l sellu encargáu d’editar el trabayu nel que’l compromisu de la banda espéyase en lletres que toquen temátiques sociales y personales.

Un trabayu billingüe
Ún de los aspectos más característicos de Misiva ye’l so apueste por un billingüismu dafechu. Los mesmos cantares ufiértense, al traviés d’un doble CD, en llingua asturiana y castellana, y ye la reivindicación llingüística otra de les pates d’esta banda que, en palabres d’Oscar González, nagua por “apurrir un granín d’arena a la dignificación de la Llingua Asturiana y a la declaración d’Oficialidá”.

“Parte de la solución”, grabáu nos Estudios Eclipse d’Uviéu cola producción de Dani Sevillano, ta a la venta dende’l 17 de setiembre y de primeres va sonar en directo na FNAC de Parque Principáu el mesmu día 17, en Cándamu el 24 d’esti mes y en La Pola L.lena el 1 d’ochobre.

Proyectos futuros d’Algamar Producciones
D’otra miente Algamar Producciones, discográfica editora d’esti trabayu, anuncia nueves referencies pal 2010. “Tiempu de povisa” de Falanoncaduca, el primer discu de la banda folk eonaviega Darbukka y "Historias que contarte cuando seas mayor", d’Edu Vigil, son los prósimos discos que van ver la lluz de la mano d’esti sellu.