La violencia de xéneru cobróse 49 víctimes hasta’l momentu n’España

Un total de 49 muyeres morrieron nel Estáu español asesinaes a manes de les sos pareyes o ex pareyes no que va d'añu, seis casos más que los rexistraos na mesma fecha del 2009, según los últimos datos tresmitíos pol Ministeriu d'Igualdá.

N’Asturies son cinco les muyeres muertes a manes de les sos pareyes o ex pareyes, la última d'elles esta mesma selmana n'Uviéu.
  
Anque tovía tán investigándose trés casos de posible violencia de xéneru en Córdoba, Mogán (Las Palmas) y Las Palmas de Gran Canaria; la última muerte confirmada por prodúxose esti miércoles na población coruñesa de Ponteceso, onde un home asesinó a la so esposa de 34 años a martellaes.
  
Al igual que nesti últimu casu nel que la muyer nun denunciare a la so pareya, de les 49 víctimes asesinaes no que va d'añu, 37 tampoco lo ficieren. Namás 12 muyeres denunciaron, anque una retiróla; diez solicitaron midíes de protección qu'a lo último-yos fueron concedíes a ocho demandantes.
  
Coles mesmes, los datos d'Igualdá, añaden que más de la metá de les muertes (el 59,2%) yeren españoles y, na so mayoría, teníen una edá entendida ente los 31 y los 64 años. De la mesma manera, 31 de les víctimes convivíen col so asesín, que na mayoría de los casos (27) yeren la so pareya sentimental nel momentu de la muerte.
  
En cuanto al perfil del agresor, l'informe indica qu'en 28 de los 49 casos teníen nacionalidá española y una edá entendida ente 31 y 64 años. Amás, del total d'asesinos, ocho suicidáronse y otros diez intentáronlo.