Erada repasa l'asturianismu n'Asturies contemporánea

Suburbia Ediciones presenta esti xueves el númberu 3 de la revista Erada, publicación añal sobre la historia contemporánea d'Asturies. Nesta ocasión, dedica los sos estudios a los movimientos nacionalistes, asturianistes y rexonalistes.

Ún de los responsables de la publicación, l'historiador Rafael Rodríguez Valdés destacó'l trabayu de Faustino Zapico, un artículu sobre les campañes autonomistes qu'a lo útlimo del sieglo XIX facíen los republicanos federales. Recuerda que yeren un movimientu especialmente fuerte naquella época y una de les campañes claves yera la llucha pola autonomía.
  
Inclúise también un estudiu d'Armando Magadán, sobre la evolución ideolóxica del partíu Asturianista, dende la so fundación nel 1985 hasta entraos los años 2000. El periodista Cristóbal Ruitiña da un repasu al papel que dientro del asturianismu xugó la revista Asturias Semanal, "que tuvo muncha importancia nos últimos años del franquismu y de la transición, y que participó na oposición política al franquismu". Rodríguez recuerda qu'ún de los conteníos importantes d'aquella publicación foi la temática asturiana, y los conteníos específicamente asturianos, asina como l'apuesta clara pol rexonalismu asturianu. Conceyu Bable tenía una sección nes sos páxines.
  
L'historiador estaounidense Patrick Zimmerman, aporta notes que falen de la tesis doctoral que va lleer l'añu qu'entra sobre la historia del nacionalismu asturianu.
  
A lo último, la estaya de reseñes bibliográfiques cita distintos historiadores.
  
Una temática “despreciada”
Rodríguez destacó que la temática d'esti númberu ye un aspectu "despreciáu por munches publicaciones d'historia". Cuenta con unes 200 páxines y tien un preciu diez euros. Ta yá distribuida peles llibreríes.