Asturies, Cantabria y Castiella y Lleón van firmar un conveniu a primeros de marzu pa la xestión conxunta de Picos

Los gobiernos de Castiella y Lleón, el Principáu d'Asturies y Cantabria van soscribir previsiblemente demientres la primer quincena del próximu mes de marzu'l conveniu de collaboración pa la xestión compartida del Parque Nacional de Picos d'Europa.
 
Asina lo manifestó güei'l conseyeru de la Presidencia y voceru de la Xunta de Castiella y Lleón, José Antonio de Santiago-Juárez, qu'aseguró que dichu conveniu ta peslláu y sólo ta pendiente'l determín de la fecha de la so firma.
 
En cuanto a la fórmula de financiación que va tener l'espaciu natural tres la soscripción del conveniu, indicó que les cantidaes tovía nun se determinaron.
 
"Una de les collaboraciones más complicaes ye la de la xestión de Picos d'Europa. Ta a puntu de firmase per parte de los tres presidentes el conveniu, que seguramente va producise sobre los primeros 15 díes de marzu; dalgo que cuando entamamos esti camín de collaboración paecía complicáu", apuntó.
 
De Santiago-Juárez realizó estes declaraciones acompañáu pol conseyeru de Fomentu, Antonio Silván, y pola directora xeneral de Rellaciones Institucionales y Aición Esterior, María de Diego Durántez, los qu'asistieron en Lleón al Comité d'Enllace y Coordinación del Protocolu Xeneral de Collaboración soscritu'l pasáu añu ente Asturies y Castiella y Lleón.
 
Igualmente, la declaración conxunta realizada por dambes comunidaes demientres l'alcuentru pon de manifiestu que les tres autonomíes trabayen na redacción del Plan d'Ordenación de los Recursos Naturales de los Picos d'Europa y nos Estatutos del Consorciu que va rexir el parque.
 
Amás, tanto Castiella y Lleón como Asturies declararon "los importantes esfuerzos conxuntos", na Estratexa pa la Conservación del Osu Pardu Cantábricu en cuestiones relatives al censu o a la comunicación de les poblaciones occidental y oriental, asina como na Estratexa de Conservación del Gallu Montés Cantábricu, no que se refier al programa de cría en cautividá o reserva xenética, ente otros asuntos.