Ecoloxistes critiquen l’estudiu ambiental de la Ruta del Alba

La Coordinadora Ecoloxista d'Asturies presentó alegaciones al "precariu" estudiu d'impactu ambiental presentáu "pa xustificar el  hormigonáu y abarandilláu" de la ruta del Alba publicáu nel BOPA el pasáu 13 de xunetu.

La organización ecoloxista considera "sorprendente" que solo se valore la opción hormigonar una ruta tan reconocida nun espaciu natural como ye'l Parque Natural de Redes que ye tamién Acuta de la Biosfera. "Non solo pretende hormigonar el trazáu, tamién pretende ponese barandielles metáliques en tola zona, restando más la poca naturalidá que-y va quedar dempués de hormigonar", llamentaron.

Criticaron l'estudiu presentáu porque intenta convencer de que nun facer nada tien mas impactu qu’hormigonar o poner asfaltu. "Ta claro qu'esta obra sigue la llínea d'otres  munches qu'executa'l Principáu previa pidimientu de los Conceyos, que tán enllenando de formigón el paisaxe, ensin causa dalguna que xustifique asemeyáu asuelu de perres públiques y con un gran impactu paisaxísticu”, señalaron dende Coordinadora Ecoloxista.

Caltenimientu natural del camín
Dende la Coordinadora apuesten pol caltenimientu del tramu d’esti camín, ente Ponte Retortoriu y Cruz de los Ríos nel Conceyu de Sobrescobiu, "en condiciones naturales y al empar óptimas de transito". Asina, amuésense decidíos a escosar les víes llegales pa torgar "esta ablucante" obra nun espaciu singular tan reconocíu.