Sindicatos convoquen cuatro xornaes de fuelga nel sector carbón

|

La Federación d'Industria de CC.OO y UXT convocó cuatro xornaes de fuelga xeneral nel sector del carbón pa los díes 22, 23, 28 y 29 d'esti mes tres nun algamar dellos alcuerdos col Ministeriu d'Industria.

El Real Decretu qu'incentiva'l consumu del mineral autóctonu en centrales térmiques, pendiente de que la Comisión Europea déa-y el vistu bonu, y el pagu inmediatu de nómines a los trabayadores de los grupos Vitorino Alonso y Lamelas Vitoria, son los desalcuerdos que lleven a los sindicatos mayoritarios a convocar la fuelga.
  
El ministru d'Industria, Turismu y Comerciu, Miguel Sebastián, y el secretariu d'Estáu d'Enerxía, Pedro Marín, reuniéronse na sede del Ministeriu mientres más de trés hores colos secretarios xenerales de FIA-UXT y de la Federación Minerometalúrxica de CC.OO y otros dirixentes sindicales pa tratar la situación del sector.
  
Tres l'alcuentru, los sindicatos apreciaron la "bona intención" del Gobiernu pero llamentaron que nun se dean "les condiciones necesaries mínimes" pa llegar a un acuerdu, según informaron a Europa Press fontes de CC.OO y UXT.
  
Mientres la reunión, Industria anunció l'abertura d'un espediente d'inspección pa los grupos Vitorino Alonso y Lamelas Vitoria, que recibieron ayudes públiques del Gobiernu por valor d'unos 380 millones d'euros pero que deben les nómines de dos meses a los sos trabayadores. Nesti sen, el Ministeriu solicitó a ambos grupos les esplicaciones pertinentes sobre'l destín d'estes ayudes públiques.
  
Tres l'alcuentru, les partes sindicales van permanecer tola nueche na sede del Ministeriu aconceyaos n'Asamblea Permanente pa estudiar les midíes a siguir y volverán reunise con Industria, anque tovía nun hai una fecha establecida pa la xunta.
  
Industria comprometióse mientres l'alcuentru a crear una Comisión de negociación sobre la fecha d'aprobación del Real Decretu del Gobiernu que contempla incentivos a la compra del carbón nacional per parte de la Unión Europea, que l'Executivu tien previsto que s'apruebe na xunta del próximu día 29.
  
Nel casu d'ambes reivindicaciones, los sindicatos consideraron que los compromisos del Gobiernu son insuficientes pa llegar a un acuerdu, polo que convocaron güelga en tol sector pa los díes 22 y 23 y pal 29 y 30 de setiembre.
  
La protesta va afectar a cinco comunidaes autónomes, que son Asturies, Castiella y Lleón, Castiella-La Mancha, Aragón y Andalucía. Al par d'esto, les centrales sindicales entamaron una acampada pal llunes en Ponferrada, delantre de les empreses afectaes pol impagu de xornales.

L’oxetivu cimeru
Esta protesta, alvierten dende los sindicatos, nun va acabar hasta que nun se llogren los oxetivos relacionaos col pagu de xornales, l'aprobación del real decretu y el compromisu del Gobiernu de dotar al sector de recursos bastantes pa garantizar la reactivación de les comarques mineres.
 

Contador Estadistiques