La Casa Cultura de Llanes entama'l tercer taller de 'xíriga', la fala de los teyeros llaniscos

La Casa Municipal de Cultura acueye'l próximu 2 de febreru'l tercer taller de 'xíriga', la fala de los teyeros llaniscos. La iniciativa, que yá se punxere en marcha per primer vez nel 2007, forma parte del programa 'Cursos municipales 2009' convocaos pol Ayuntamientu de Llanes en collaboración cola Obra Social y Cultural de Caxastur.
 
El cursu d'ocho hores de duración, tien un carácter d'espardimientu, con partes teóriques y práutiques, indicó l'Ayuntamientu en nota prensa. Va desarrollase demientres los cuatro llunes del mes de febreru, n'horariu de 19.00 a 21.00 hores y la tasa a abonar por cada alumnu ye de diez euros.
 
Tomen parte nesta actividá dellos antiguos teyeros o tamargos que dan testimoniu en cada sesión de la so esperiencia personal nesti oficiu. El taller inclúi tamién comentariu de testos, dictaos, redaiciones y tornes.
 
Per otra parte, la Casa de la Cultura de Llanes va acoyer dende'l 2 de febreru, un taller municipal d'encuadernación, tamién dientro del programa 'Cursos municipales 2009'.
 
L'actividá va impartila Juan Ramón Carrera Castro. Esti cursu va durar dos meses hasta'l día 23 de marzu y inclúi una clase selmanal los llunes, de 17.30 a 20.30 hores, hasta completar un total de 24 hores llectives. El costu pa los alumnos asciende a 60 euros.