El Conseyu de Gobiernu aprueba la toponimia de cinco nuevos conceyos

Taramundi, Santalla d’Ozcos, Vilanova d’Ozcos y Samartín d’Ozcos, nel occidente; y Quirós, nel sur de la fastera central; son los cinco nuevos conceyos qu’afiten la toponimía tradicional, aprobada’l día 15 pol Conseyu de Gobiernu.

“A partir de la entrada a valir de los decretos aprobaos pol Conseyu de Gobiernu, les Alministraciones Públiques van adecuar de manera progresiva, acordies coles sos disponibilidaes presupuestaries y, en tou casu, al momentu de la so renovación, les rotulaciones en víes públiques y carreteres de los cinco conceyos citaos”, señalen dende’l Conseyu de Gobiernu. Añaden tamién que van facer lo mesmo con “mapes y planos oficiales”.

63 conceyos
El procesu de recuperación de la toponimia tradicional arrancó en 2004 cola creación de la Xunta Asesora de Toponimia del Principáu d’Asturies. Con trabayu de campu y la collaboración d’autoridaes municipales y colectivos vecinales y culturales, pasu ente pasu van afitándose los nomes tradicionales de los llugares d’Asturies. Anguaño, 47 conceyos yá revisaron los sos topónimos tradicionales y 16 iniciaron esti procesu.