El CUPA critica l’ausencia del asturianu na Casa de les Llingües

El Conceyu Universitariu pol Asturianu manifiesta otra vuelta’l so descontentu cola dirección de la Casa de les Llingües de la Universidá d’Uviéu. Critiquen l’ausencia de cursos n’asturianu pesie a les promeses del Rector, Vicente Gotor.

Yá ye la segunda vegada que’l CUPA protesta pola situación del asturianu en rellación a la Casa de les Llingües. Esti ente creóse va yá cuasi un añu y mediu y entá nun s’ufierten cursos d’asturianu, un serviciu que, como afirmen dende’l CUPA, “ufriéndose embaxo demanda nun tendría nengún gastu estraordinadiu pa la Universidá d’Uviéu”.

El colectivu universitariu señala tamién que’l rector Vicente Gotor prometiere que la Casa de les Llingües diba incluyir nel so programa cursos d’asturianu y reclamen que la páxina web d’esti organismu use la llingua de forma normal, yá que, como denuncien, “ye una de les poques de la Universidá que nun ufierta versión n’asturianu”.