CSI convoca una movilización alternativa a UXT y CC.OO pal 29-S

La Corriente Sindical d’Izquierda vien de llamar a la participación na fuelga xeneral del 29 de setiembre. Con crítiques al Gobiernu, a la Patronal y a UXT y CC.OO, la Corriente convoca una manifestación alternativa en Xixón.

Dende la CSI denuncien la situación económica y social que se ta viviendo n’Asturies y nel Estáu español. El sindicatu asturianu señala que la patronal y la banca “pretenden siguir consiguiendo los mesmos beneficios a costa del dineru públicu y del bolsu de los trabayadores”, mentantu que’l Gobiernu “impón una reforma llaboral qu’abarata y facilita’l despidu”

La conxelación y baxa de los salarios, la reducción de les pensiones, l’aumentu de la edá de xubilación a los 67 años, les condiciones llaborales y los recortes n’inversiones sociales y en sanidá, educación y servicios públicos; fueron otres de les crítiques de la Corriente Sindical d’Izquierda.

Al mesmu tiempu, la CSI critica’l llabor d’UXT y CC.OO a los que califica de “dinosaurios burocratizaos” y de tar “financiaos y sosteníos polos distintos gobiernos”. Por mor de les discrepancies colos sindicatos mayoritarios, la Corriente convoca una manifestación alternativa pal 29 en Xixón, con salida a les 13.00 de la Plaza l’Humedal.

La situación real
Dende’l sindicatu de clase tamién denunciaron la situación real económica y social. Casi 100.000 paraos n’Asturies, 5 millones de trabayadores que nun lleguen al Salariu Mínimu Interprofesional y 40% de la mocedá desempleao nel Estáu español y 30.00 families asturianes con tolos integrantes en paru; son aspectos criticaos pola CSI.