El Bloque acusa al Principáu de “desmantelar” la enseñanza pública

Énte l’aniciu del nuevu cursu escolar, el Bloque por Asturies acusa al Principáu de “desmantelar” la enseñanza pública con “precariedá y illegalidaes”. Los recortes, les esternalizaciones y l’axudicación d’intirenidaes son dalgunes de les crítiques.

Nun cursu 2010/2011 nel que medró l’alumnáu y baxó’l profesoráu, el Bloque por Asturies critica los recortes salariales del profesoráu, n’Asturies per enriba de lo marcáu pol Gobiernu de Madrid, los recortes n’empleu y los recortes n’atención educativa. “Ye evidente que la precarización y l’empeoramientu lleva a una perda de la calidá n’atención educativa”, señalen los nacionalistes.

Opónse tamién el Bloque a la “brutal” xuba de les medies xornaes y la baxada en contrataciones, que lleva a la falta de personal docente pa l’atención de la diversidá, desdobles, llaboratorios y programes educativos, como’l de biblioteca, los comedores escolares o la orientación educativa. A la par que critiquen la esternalización de servicios educativos, a la que califiquen de “procesu de desmantelamientu imparable de la enseñanza pública”.

Irregularidaes colos interinos
Tamién denunció’l BA el procesu d’axudicación de les places a interinos que según esta organización, poles sos irregularidades, agora la “Conseyería d’Educación cuerre’l grave riesgo de tener que pagar importantes indemnizaciones a los profesores afectaos”. “Una vez más, los asturianos y asturianos tendremos que pagar con perres públiques la incapacidá, neglixencia, caprichos y irresponsabilidá del Gobiernu del Principáu”, sentencien dende’l Bloque por Asturies.