L’Arribada 2010 espardi la cultura asturiana pel país

Otru añu más aporta L’Arribada a Asturies. Esposiciones, lliteratura, música, meses redondes y cine, ente otros, van tener presencia nesti eventu cultural nel que la llingua asturiana ye la protagonista.

En tres partes va dividise L’Arribada d’esti añu: Vagamar, con actividaes en Xixón nel mes de setiembre; Per Asturies, que va pasar per Corvera, Villaviciosa y Colunga n’ochobre y payares; y Rolda, estaya qu’entamó a facese en Xixón n’abril de 2010 y que va llevar nueves actividaes demientres l’últimu trimestre de 2010.

El prósimu sábadu 18 arranca en Xixón Vagamar y nun va aparar hasta’l sábadu 25. Nesos díes van dase cita en dellos llugares de la villa de Xovellanos milenta actividaes, como recitales poéticos, esposiciones fotográfiques, visionáu de películes y documentales – ente les que destaca “La nueche de los muertos vivientes”, primer llargometraxe tornáu al asturianu – y música en vivo, ente otres actividaes culturales.

Per Asturies y Rolda
Esti eventu coordináu pol xestor cultural y escritor Humberto Gonzali, tamién va pasar les llendes xixoneses. El 5 y 7 d’ochobre va aportar a Les Vegues de Corvera, el 5 de payares a Colunga ya’l 27 de payares a Villaviciosa. Entá nun se saben los actos d’esta estaya de L’Arribada, como tamién se desconocen los de Rolda, que va ser l’últimu trimestre de 2010 en Xixón.