IU de Llaviana propondrá la declaración d'oficialidá al Conceyu pa "meyorar" l'acuerdu plenariu de 1998

Izquierda Xunida de Llaviana quier qu'esti Conceyu vuelva declarar la oficialidá de la llingua asturiana, como yá lo ficiere en 1998, motivu pol que va volver plantegar al próximu plenu la propuesta aprobada naquella ocasión, si bien renovada y redautada n'asturianu, dao que l'anterior presentóse sólo en castellán.
 
Asina lo esplica la coalición nuna nota prensa a la que tuvo accesu Europa Press, na qu'axuntaron la declaración d'oficialidá redautada en llingua asturiana.Según espunxo José González, conceyal d'IU y teniente alcalde nel Ayuntamientu (en Llaviana gobierna'l PSOE en coalición con Izquierda Xunida), la so intención ye volver "dar puxu" a les polítiques en favor de la llingua asturiana porque, a pesar de que nesti conceyu l'asturianu ye "oficial", ello sólo se cumplía "a medies". Asina, señaló qu'anque se ficieron coses, "tovía queden otres munches por facer".

Ente elles, calcó na necesidá de que de magar agora, tolos vecinos del conceyu se puean dirixir al Ayuntamientu n'asturianu, pa lo que pretende que se tornen al asturianu un altu porcentaxe d'impresos y documentos alministrativos que s'ofrecen a públicu pa la so presentación. Tamién fala de facer campañes de promoción, cursos, emplegu de la llingua nos carteles, rotulaciones y campañes publicitaries, asina como la utilización de los topónimos tradicionales.

Son dalgunes de les propuestes que s'incluyen nesti documentu, nel que se declara la oficialidá de la llingua asturiana dientro les llendes del conceyu. Tamién se propón el pidimientu a los grupos políticos representaos na Xunta'l Principáu de qu'incluyan la oficialidá nel próximu Estatutu d'Autonomía y se propón que se cree un serviciu de normalización llingüística pa tola Mancomunidá del Valle del Nalón.

Too ello plantégase dempués d'incluyir nel testu un resume de la historia y evolución de la llingua, y una argumentación xurídica basada na Declaración de Derechos Humanos, nos decretos de la Unión Europea y del Conseyu d'Europa, na Constitución Española y nel Estatutu d'Autonomía d'Asturies, qu'inclúi la Llei de Promoción y Usu del Asturianu. También s'espón la necesidá de normalización llingüística existente nel conceyu.

PERSPECTIVES D'APROBASE

González mostróse convencíu de que la propuesta va aprobase nel próximu plenu municipal, que va celebrase'l próximu xueves, 29 de xineru. La corporación compónse d'ocho conceyales del PSOE, cinco del PP, trés d'IU y ún de la coalición URAS-PAS.

 La iniciativa d'IU surde de magar l'abertura del Serviciu de Normalización del Asturianu per parte de la Conceyalía de Promoción de la llingua. L'oxetivu ye da-y el puxu "definitivu a la llingua nesti conceyu".