El Bloque pide homenaxear a lluchadores antifranquistes

El Bloque por Asturies vien d’apoyar la propuesta de FAMYR, colectivu asturianu de memoria histórica, de conceder a los antifranquistes Cristino García Granda y José Antonio Alonso, el títulu de Fíu Predilectu y la Medalla d’Oro d’Asturies

Dende’l Bloque por Asturies consideren “indispensable” facer un reconocimientu públicu “a tolos homes y muyeres que lleven tola so vida lluchando pola Memoria, la Verdá y la Xusticia”, asina ye como apoyen la propuesta de la Federación Asturiana Memoria y República, FAMYR, pa dar a Cristino García Granda, el títulu de Fíu Predilectu d’Asturies, y a José Antonio Alonso “Comandante Robert”, la Medalla d’Oru de Asturies.

“Namás que tienen mieu de mirar p’atrás aquellos que tienen daqué qu'esconder”, señalen dende’l Bloque, a la par que defienden investigar los crímenes del franquismu planteando que nun se pue dexar que “l'olvidu sotierre a les milenta persones que fueron asesinaes y morrieron de manera heroica, anónima y desconocida en defensa de los valores de democracia, llibertá y xusticia social”.

Pendiente dende la Transición
Al mesmu tiempu, la formación nacionalista denuncia que dende la Transición “se caltién una doliosa deuda ética y moral coles xeneraciones que sufrieron la represión franquista y l'amnesia del sistema que lu siguió”.  Por eso llamen a recuperar la memoria y refugar los planteamientos que presenten iguales a “víctimes y victimarios”.