Ecoloxistes n’Acción esixe a Zapatero midíes nel conflictu del carbón

|

Ecoloxistes n'Acción esixó al Gobiernu que " tome les midíes necesaries nel conflictu de la minería del carbón, provocáu pol impagu de los xornales pela patronal, y qu'elimine esti mineral na xeneración eléctrica nel Estáu español.

Asina, encamienta al Executivu a "nun dexase influyir" por una patronal de la que diz que "vive dende hai tiempu" de les sovenciones y que "nun dude en dexar de pagar los xornales" a los mineros pa presionar al Gobiernu, "algo que califica de chantaxe inalmitible".

La organización considera que'l sector de la minería del carbón pretende llograr influyir tamién na Unión Europea, que tien que decidir nel plazu d'un mes si'l 2014 va ser l'últimu exerciciu con ayudes a la estracción d'esti combustible fósil.

"Esti ye un conflictu que tendría que tar zarráu dende hai años, pero por razones económiques, de les empreses del sector, y electorales, del Gobiernu de vez, prollongar artificialmente l'agonía del sector, provocando conflictos como los que tán asocediendo estos díes nel norte de Palencia y nel Bierzo", añade l'asociación.

Coles mesmes, recuerda que'l carbón ye'l mineral fósil que más contamina, dao que nun sólo emite trés veces más gases d'efectu invernaderu que'l gas, sinón que la so combustión emite tamién dióxidu d'azufre y óxidos de nitróxenu que provoquen agua áceda, y otros compuestos como metales y partícules.

Amás, denuncia los impactos d'esta minería nos ríos y nel so entornu, al tiempu que, na so opinión, "económicamente el carbón español ye invidable nes condiciones actuales".

Poles enerxíes renovables
A lo último, Ecoloxistes n'Acción señala que teniendo enerxíes renovables n'España ye "inconsistente y irracional siguir tirando'l dineru pa caltener una actividá obsoleta". "Les comarques afectaes pola minería precisaríen tola so mano d'obra y muncha más pa producir con renovables la mesma enerxía que'l carbón, que tovíla ta estrayéndose", apunta.

 

Contador Estadistiques