La llingua mirandesa celebra’l so día el vienres 17

El mirandés va celebrar el so día’l prósimu 17 de setiembre. Nesa fecha, cúmplese l’aniversariu de la presentación del proyectu de llei qu’algamó’l reconocimientu llegal d’esta variedá llingüística del asturlleonés falada en Portugal.

El 19 de payares de 1998 el Parlamentu de la República de Portugal declaró la oficialidá del mirandés, pero enantes, el diputáu Júlio Meirinhos presentó en 17 de setiembre’l proyectu de llei que fixera posible da-y un marcu llegal dignu a esta variedá llingüística.

Esti añu la celebración del “Die de la Lhéngua Mirandesa” va celebrase en Miranda do Douro con dellos actos rellacionaos cola llingua. La ponencia “Más de mil años de llingua mirandesa”, palestrada per Amadeu Ferreira; esposiciones y la representación teatral de la obra en mirandés “Ls lusíadas”, son dalgunos de los conteníos.

Variante asturlleonesa oficial
El mirandés o lhéngua mirandesa ye la única llingua de too’l troncu llingüísticu asturlleonés qu’anguaño tien reconocimientu oficial. Fálase nel conceyu portugués de Miranda do Douro y en dalgunes partes de Birmioso, con unos 15.000 falantes. Amás de la oficialidá, esta llingua tamién s’entamó a deprender nes escueles nel cursu 1986/87. El “Anstituto de la Lhéngua Mirandesa”, creáu en 2003, ye’l órganu encargáu de la so promoción y normalización.