Derrota merecida del Sporting

Nun mal vezu qu’amás entama a ser peligrosu los asturianos regalaron otru partíu fuera de casa. Perdieron énte’l Getafe, y esta vez de goleada: 5 a 1. Un porteru d’estrenu y algo inseguru, una defensa en Babia y un centru del campu incapaz de construyir una xugada en condiciones fueron los elementos del desastre del Sporting en tierres madrileñes.

Y ye que cuando regales dos goles nos primeros vente minutos lo normal ye que’l partíu acabe como acabó, en goleada. El primeru foi consecuencia d’una cesión increíble de Jorge énte un indecisu Lafuente fue aprovechada por Soldado, delanteru que va tener el so día. El segundu sería un tiru de Granero dende fuera del área a los pocos minutos. A partir d’esi momentu los asturianos reaccionaron, y hasta la final de la primer parte intentaron xugar a fútbol. Y llegó’l premiu nel descuentu, cuando Barral recibió nel área, y marcó de tiru curzáu.

La segunda parte entamó con una clarísima oportunidá de gol, na que Barral solo delantre’l porteru estrelló la pelota contra’l cuerpu d’esti. Los siguientes 40 minutos demostraron que namás foi un espeyismu, yá que al Sporting cayeron-y otros tres goles, dos mas de Soldado, ún d’ellos de penalti claru, y otru d’Uche, dambos n’estáu de gracia, xusto lo contrario que la zaga asturiana.

En definitiva un partíu pa olvidar nun Sporting que fue a Getafe pensando mas nel partíu de Copa del miércoles. L’Sporting continúa con 24 puntos nel puestu decimucuartu.
 
 
Ficha Técnica

Getafe 5- Sporting de Xixón 1

Getafe: Jacobo; Cortés, "Cata" Díaz, Mario (Ibrahim, min.71) Licht; Granero, Polanski, Casquero (Celestini, min. 83), Gavilán; Manu (Soldado, min. 12) y Uche.

Sporting de Xixón: Lafuente; Sastre, Jorge, Neru, Canella; Camacho (Maldonado, min.65) Matabuena; Pedro (Bilic, min.65), Carmelo (Lora, min. 70), Kike Mateo; Barral.
 
Goles: 1-0, min. 15: Soldado aprovecha una cesión errónea de la defensa del Sporting. 2-0, min. 16: Granero marca dende fuera del área. 2-1, min. 45: Barral, de xugada personal dientro del área. 3-1, min. 56: Soldado remata a placer un pase de Uche. 4-1, min. 69: Uche aprovecha un pase en profundidá de Casquero. 5-1, min. 70: Soldado, de penalti.

Árbitru: Turienzo Álvarez (Comité Castellanu): Sacó tarxeta amariella a Barral (min. 67) y a Neru (min. 69).