La reivindicación de “Democracia p’Asturies” percorre Uviéu

Baxo’l llema “Democracia p’Asturies”, Uviéu vivió una manifestación de calter soberanista. Andecha Astur, Darréu y la CSI fueron les organizaciones que se sumaron a esta convocatoria pa denunciar “la situación predemocrática que carez Asturies”

Detrás d’una pancarta única col llema “Democracia p’Asturies”, un centenar de persones movilizáronse pa reclamar el “drechu inalienable” qu’Asturies tien “a poder decidir llibremente’l modelu políticu, económicu, social y cultural”, como manifestó la vocera de la plataforma convocante de la manifestación, “Democracy for Asturies”, na so intervención.

“Los gobernantes que tenemos, ello ye, los responsables de les sucursales de PSOE, PP ya IU n’Asturies, tán esfarrapando la nuesu nación dende tolos frentes posibles”, criticó la persona encargada de lleer el manifiestu. Nesi sen tamién afondó Darréu, la organización xuvenil independentista, que na so intervención señaló qu’Asturies “afronta agora un retayu nos sos drechos políticos y como trabayadores”.

La organización d’izquierda nacionalista Andecha Astur y la Corriente Sindical d’Izquierda fueron les otres organizaciones que percorrieron les cais d’Uviéu. El sindicatu asturianu, que tamién participó na concentración de Xixón, criticó la falta de democracia na estaya social y llaboral y demandó que’l “progresu d’Asturies tien d’apareyar el progresu de la mayoría’l Pueblu Asturianu y esa mayoría nun ye otra que la clas obrera asturiana”.

Por una alternativa política
Tamién les palabres pronunciaes pol representante de la Corriente na so intervención llamaron a “la responsabilidá” de crear “un alternativa política fuerte que-y eche la galga a quienes-y ñeguen el pal y el sal a Asturies”. Na mesma llínia se posicionó Mariu Arbesú, qu’intervino en nome d’Andecha Astur y señaló la voluntá de crear un proyectu unitariu anque “ensin interferencies d’IX nel procesu de xunidá del nacionalismu asturianu d’izquierda”. Arbesú tamién tuvo presente nos actos de Xixón y Candás.