L'Audiencia Nacional prohíbe la marcha de la izquierda abertzale

El xuez de l'Audiencia Nacional Ismael Moreno prohibió la marcha convocada esti sábadu en Bilbao por parte del nacionalismu vascu, al considerar que la so celebración podría constituyir “apoyar la estratexa d’ETA”.

Nun autu de tres páxines dictáu esti xueves, el titular del Xulgáu Central d'Instrucción númberu 2 ordena al Departamentu d'Interior del Gobiernu vascu y a les Fuerces y Cuerpos de Seguridá del Estáu que "adopten les midíes necesaries pa torgar la celebración del actu referíu, eviten la comisión de fechos delictivos y proceda a instruyir les dilixencies necesaries en relación col que participen na execución de los mesmos".
  
La decisión del maxistráu produzse tres un pidimientu de la Fiscalía, qu'entiende que la plataforma convocante "nun ye más qu'una sucesión de Batasuna y sigue les directrices de la organización terrorista ETA", y cuatro díes dempués de que la banda ficiere públicu un comunicáu nel qu'anunciaba'l cese de los sos accciones "armaes ofensives".
  
La resolución xudicial, contra la que cabe recursu, caltién que la documentación remitida tanto pol Ministeriu Públicu como pola Asociación de Víctimes del Terrorismu (AVT), que tamién solicitó la prohibición del actu, pon de manifiestu qu'existen "fundaos nicios" de que la marcha "pudiere revistir los carácteres" d'un delitu d'allabancies al terrorismu y humildación a les víctimes, contempláu nel artículu 578 del Códigu Penal.

Convocatoria plural abertzale
La manifestación, convocada por representantes de la izquierda abertzale, Eusko Alkartasuna, Alternatiba, Lokarri y el sindicatu LAB, ente otros, tien el lema "Tolos derechos pa toles persones en toa Euskal Herria" y pretendía, según los convocantes, defender que "los conflictos puean resolvese per víes puramente pacífiques, polítiques y democrátiques, sin esclusión nin imposición alguna".
  
La Fiscalía de l'Audiencia Nacional pidió'l miércoles la prohibición del actu tres señalar qu'ente los convocantes alcuéntrense "históricos dirixentes del frente político-institucional d'ETA", ente los que citaba a Tasio Erkizia y "cargos municipales de la ilegalizada ANV", como Marian Beitialarrongaitia, alcaldesa d'Hernani; y Nicolás Moreno, rexidor d'Elorrio.