Baxen les ventes de la industria discográfica n'asturianu

La industria discográfica en llingua asturiana ve peligrar la so sobrevivencia, dau'l descensu de ventes padecíu por esti mercáu nos últimos años. Les cases debaten la so visión de futuru ente'l replantegamientu total o la simple desapaición.

 


La industria discográfica en 'llingua asturiana' ve peligrar la so sobrevivencia, dau'l descensu de ventes padecíu por esti mercáu nos últimos años, y que delles cases, como L'Aguañaz, cifren sobre un 70%. Preguntaos por Europa Press, dellos productores (Tierra, Algamar, Fonoastur y la mesma L'Aguañaz) debaten la so visión de futuru ente'l replantegamientu total y la venta al traviés d'internet, o la simple desapaición.
 
Ún de los casos más significativos ye'l de L'Aguañaz. El so responsable, el vocalista de Dixebra, Xune Elipe, esplica que les tiraes de la firma pasaron en cuatro años de 2.000 a 500 exemplares. Según recuerda, nos bonos tiempos la discográfica llegó a editar siete trabayos nun añu, mientres que nel presente 2010 namás sacó'l discu 'Ye too mentira' de Skama la Rede. Pal 2011 tien la esperanza de sacar dos trabayos, a lo más.

"El top cobertor nun mos afectaba, pero cuando empezaron les descargues per internet, eso notámoslo muncho", señaló. Dende'l so puntu de vista, "hai que replantegar el negociu", porque "tamos asistiendo a los últimos años de la industria discográfica". El cantante de Dixebra nun tien claru'l so futuru como productor, pues ve'l discu namás como "una carta de presentación" de los grupos.

Otra mítica firma que notó'l descensu ye Fonoastur, fundada en 1987 pol cantante Chus Pedro (Nuberu), l'actual conceyal de Cultura d'Uviéu, José Suárez Arias Cachero, y el so actual responsable, Lisardo Lombardía. Ésti últimu considera "terrible y difícilmente sostenible" la baxada de ventes. Esti factor, y el so actual cargu de director del Festival Intercélticu de Lorient reduxo l'actividá de la discográfica a la "mínima espresión", pero anunció que va siguir "dando señales de vida". Confía na sobrevivencia del discu como soporte físicu preferíu per una parte de l'audiencia, y poro en siguir figurando como marca, con "los nuesos proyectos más emblemáticos", ente los que citó al grupu Llan de Cubel, o los discos Muyeres y La Nueche Celta.

Lisardo Prieto, de Disco Tierra, percibió tamién una baxada considerable nos dos escasos años de vida de la firma, nacida nel 2008. Pela so parte, Pablo Quiroga, de Producciones Algamar, nun pue facer comparances, pues la discográfica lleva un añu trabayando, pero recuerda que La Col.la Propinde, ún de los grupos más renomaos colos que trabaya, llegó a vender ente 1.200 y 1.800 exemplares de los sos álbumes anteriores. "Nesti momentu nun tienen esi tirón", esplica.

Prieto entiende que "los guah.es de güei nun tienen cultura de mercar discos", polo que ve difícil que s'acaben nes tiendes tiraes de 2.000 discos, marca alcanzada nel so día por Felpeyu, grupu del que forma parte, y máximu esponente de Tierra, xunto con Corquiéu. Ve tamién el discu namás como una futura carta de presentación promocional de los grupos y apuesta por una reconversión de la industria a la venta per internet.

Pela so parte Quiroga sí confía nel caltenimientu de la industria: "nun podemos dexar d'editar discos d'una manera o d'otra y dar a conocer lo que faen estos grupos. Tamos más preocupaos pola cultura xeneral n'Asturies, que poles mesmes ventes, puesto que con cubrir los gastos yá ye abondo", señaló. Al so xuiciu, "mientres haya ayudes pa poder sacar estos discos, y que nun se xeneren perdes, ye esencial que se dean a conocer los trabayos musicales de grupos as