Unión Asturianista critica nel 8-S la “mala xestión” de los centralistes

|

Unión Asturianista, coalición formada pol PAS y la URAS, festexó’l 8 Setiembre en Candás. L’aniciu de la campaña “Y tu, ¿Qué opines?”, intervenciones polítiques y un homenaxe a los trabayadores asturianos, fueron los actos principales.

L’actu del Día de la Nación Asturiana d’Unión Asturianista entamó a primer hora de la mañana nuna carpa instalada nel centru de Candás. Col oxetivu de “dar a conocer el mensaxe y les propuestes de la coalición” y recoyer la opinión de ciudadanos d’a pie, empecipiaron cola campaña “Y tu, ¿Qué opines?”.

 “Esti añu cuntóse con una organización más importante y notóse na asistencia de militantes y simpatizantes”, declaren dende’l PAS a ASTURIES.COM, valorando positivamente la so celebración del día del país. Les estimaciones feches pola organización cifren la participación en más de doscientes persones.

Intervenciones polítiques
El representante llocal d’Unión Asturianista en Carreño; el presidente d’Unión Renovadora Asturiana, Javier López; y Xuan Xosé Sánchez Vicente, presidente del Partíu Asturianista; dieron voz a la coalición coles sos intervenciones polítiques.

 “La mala xestión de los partíos centralistes”, según Javier López, y les “ansies” d’Unión Asturianista “pol progresu d’Asturies”, en palabres de Sánchez Vicente; fueron dalgunes de los aspectos sorrayaos nes intervenciones. Destacó tamién el facer alcordanza de la historia de la nación asturiana “única, xunto a Cantabria, con un nome diferenciáu cuando aportaron a la Península los romanos”, señaló’l presidente del PAS.

Homenaxe a los trabayadores asturianos

Tres de les intervenciones polítiques, los asistentes al actu percorrieron les cais de Candás hasta aportar al monumentu a la mar y a la mina. Ellí fíxose un homenaxe a los trabayadores asturianos, daqué qu’Unión Asturianista consideró importante por tar “nun momentu de crisis tan dura como esta”.

La celebración d’esti 8 setiembre, que la organización caracterizó por tener “nuevos conteníos”, dio fin con una xinta de xermandía. Nella participaron militantes del PAS, URAS, Xuventú Asturianista y Mariu Arbesú, Secretariu d’Organización d’Andecha Astur que tamién fizo presencia na concentración de Xixón y na manifestación d’Uviéu.

 

Comentarios

Mas de lo mesmu!!!!Ocasion perdia ,ye  lo que se fixo....La xuntanza fai la forza,poro si la espardemos nengun la notara.Asina ye, aunque un garrapiellu ,creya otra cosa.
Hai que tar ,onde ta la xente pa glayar ,facer ver lo que, fariamos diferente que, somos una alternativa !!Asina na se fixo ,polo menos p'Asturies, non se gano un solu votante nuevu!!!
Que cadun coza el so pote que,vamos dir mui lloñi!!!!!!!

Contador Estadistiques