Xixón vive un 8-S marcáu pol deséu y l'acción d'un cambiu p’Asturies

|

Pluralidá, ilusión, denuncia y llamada a l’acción. Eses fueron les protagonistes de la concentración convocada en Xixón nel 8-S. Los Xardinos del Náutico vivieron una xornada marcada pol deséu de “sumar voluntaes pa construir una alternativa”.

Baxo’l llema de “Pol futuru d’Asturies” y la convocación de la Plataforma Unitaria 8-S, Xixón acoyó un actu nel qu’unes 300 persones d’oríxenes y perfiles plurales axuntáronse col oxetivu de “dar una rempuesta” al actual modelu d’Asturies y llamar al “optimismu, a la recuperación de l’autoestima y a la defensa de la economía, cultura y mediu ambiente”, como señaló l’actor Toño Caamaño, presentador del actu.

Les socesives intervenciones afondaron nesi sen. Javier Orozco, sindicalista colombianu refuxáu n’Asturies, punxo voz dende la solidaridá internacional a la problemática social y económica que ta viviéndose nel país y nel mundu. Pablo Quiroga, miembru de la plataforma contra’l desmonte d’Aboño, denunció la situación medioambiental causada cola complicidá de los “gobiernos del Principáu”. Tamién la dignidá de la cultura y llingua asturiana tuvo’l so sitiu, coles palabres del actor Jose A. Lobato.

Pero l’actu nun quedó namás en denuncies. El gaiteru mozu Llorián García y la intérprete de tonada Mari Luz Cristóbal fixeron delles interpretaciones musicales qu’espardieron el soníu de raigañu del país pente los asistentes al actu. Xente del mundu sindical, llingüísticu, políticu, cultural, periodísticu, musical y una destacada presencia de mocedá, fueron dalgunos de los movilizaos nesta mañana del 8 setiembre.

L’Asturies oficial y l’Asturies del futuru
La llectura d’un manifiestu consensuáu ente toles organizaciones participantes na Plataforma Unitaria 8-S dio fin a la concentración. El mensaxe lleíu por Toño Caamaño siguió na mesma llínia de les demás intervenciones: denunciar l’actual “Asturies oficial”, que caracterizó por recortes, ERES, esfarrape ecolóxicu, negación de la capacidá y cultura d’esti pueblu…; y plantear l’alternativa de “l’Asturies del futuru.”

“Ye’l momentu de sumar voluntaes con xenerosidá pa construir una alternativa social y política que potencie’l texíu asociativu asturianu, que refuercie les sos reivindicaciones, les sos lluches y la so autonomía”, espresábase nel manifiestu. Asina ye como les palabres plurales tresmitíes per Caamaño declararon qu’hai “muncha xente” dispuesta “a trabayar pa devolver a la sociedá l’optimismu, l’autoestima, l’arguyu, el dinamismu y la capacidá de respuesta”. 

Esta “Asturies del futuru” vien con unes polítiques basaes “na xusticia, social, la rexeneración política y la firme defensa del mediu ambiente”, insistióse nesta intervención, al mesmu tiempu que se llamó a que’l “patrimoniu, llingua, identidá y cultura del país” tengan el “papel fundamental qu’agora se-yos niega”. Nesta mañana del 8 setiembre abrióse una puerta a esa Asturies diferente, el camín a percorrer decidirá cuál va ser el futuru del país.

Valoraciones positives
ASTURIES.COM quixo conocer les valoraciones del actu per parte de persones de dalgunes de les organizaciones presentes na Plataforma Unitaria 8 de Setiembre. L’optimismu y una opinión positiva foi el tonu xeneralizáu.

“Ye un actu que per primer vez axunta a organizaciones que tamos faciendo un trabayu paralelu en diferentes ámbitos”, declaró Faustino Zapico, portavoz d’UNA, en rellación a lo novedoso d’esti 8-S. Rafael Palacios, portavoz del Bloque, tamién valoró la concentración como “mui positiva”, sobre too nel sen de “convocalo de la forma más unitaria posible”, porque consideró que, “facía munchu tiempu que se venía reclamando un actu d’estes característiques”.

“Puede significar un puntu d’inflexón pa algo que considero mui importante, que ye la creación d’una nueva fuerza política n’Asturies capaz de romper esi réximen instauráu pola FSA”, opinó Francisco Javier García Valledor, es-conseyeru de Xusticia del Principáu y militante d’IX que participó nel actu a nivel individual.

Continuidá nel futuru
Xunto a les bones valoraciones, rescampló tamién la voluntá de siguir trabayando a comuña por una alternativa política. “Construir un referente políticu estable y fuerte” ye l’aspiración de Palacios, que ve importante y alcanzable “conseguir representación na Xunta Xeneral y nos conceyos”. Esta dinámica en planu municipal tamién la destacó Xuan Rodríguez, conceyal d’UNA en Carreño, que no cincante a la so rellación con UICA, partíu independiente carreñense, declaró que pa les prósimes elecciones “a lo meyor puede facese una candidatura conxunta como manera de sumar fuerces”.

Valledor tamién señaló a esti diariu dixital la necesidá de crear “un proyectu de país creíble”. Como tovía militante d’Izquierda Xunida, opinó que la so organización “non ta pola llabor” de sumase y añadió que él va siguir “apoyando esti proyectu y trabayando con tola xente que pueda tar interesao nél”.

Con vistes a un futuru más unitariu nel asturianismu tamién fueron les declaraciones de Belarmino Álvarez, portavoz d’UNA-Mocedá. “Que nun quepa dubia de que la mocedá ye la que más apuesta pola xuntanza” sorrayó Álvarez, defensor de mayor collaboración ente “los órganos de decisión de les xuntes executives de los partíos” porque, como opina, “la mocedá necesita un referente n’Asturies”.
_____________________________________________________________________
ASTURIES.COM va ufrir mañana un galería de semeyes del actu y información de les demás convocatories celebraes nesti Día de la Nación Asturiana

Comentarios

Fai muncha falta n'Asturies ,esa alternativa  pa camudar les coses y la burlla que, fai el gobiernu , de tou lo asturianu.
Agora ye el llugar bonu pa facelo??En Ribesella foron unos cuatrocientos-mil......en Xixon unos cientos!!Pode camudase dalgo asina ??? Non ye meyor facelo onde la xente ta???Facese ver ,informar de lo que, fai falta!!!Con informacion  y conversacion!!!Tando presente elli onde se cuece..
Non vien el güesu al perru,tien que dir elli pol güesu.

Cuantos votantes ñuevos se ganaren ayeri ???Cuanta xente se entero de una alternativa p'Asturies.
Con una politica diversa a la fecha ???Nenguna ye lo ciertu .La xente non sabien ni que,yera iso!!Ni se enteraren, paicia una cosa rara.
Con certeza que, en Ribesella ,onde taba el xentiu ,mas d'un  camudaria el so pensar  y votaria por esa alternativa..
Hai que, convencer la xente ,facer ver lo que, presentamos y ufiertamos ,con informacion organizada y conceyu con la xente, elli onde se cuez!!!
Folixa podemos facer en tou llugar ,poro en folixa queda.

Cuantos votantes ñuevos se ganaren ayeri ???Cuanta xente se entero de una alternativa p'Asturies.
Con una politica diversa a la fecha ???Nenguna ye lo ciertu .La xente non sabien ni que,yera iso!!Ni se enteraren, paicia una cosa rara.
Con certeza que, en Ribesella ,onde taba el xentiu ,mas d'un  camudaria el so pensar  y votaria por esa alternativa..
Hai que, convencer la xente ,facer ver lo que, presentamos y ufiertamos ,con informacion organizada y conceyu con la xente, elli onde se cuez!!!
Folixa podemos facer en tou llugar ,poro en folixa queda.

Paecióme un mui bon actu, dientro de les llimitaciones que'l nuesu mundu tien.
Namás que tres crítiques constructives:
- Entamóse endemasiáu tarde a pegar cartelos y mover la convocatoria, nesi sen ye bono dir con más díes de marxen.
- Echóse en falta la redacción d'un panfletu conxuntu pa repartir ente la xente de la cai qu'andaba pasiando pel Náuticu y ente los asistentes.
- Xunto a la interpretación de tonada y gaita, yera bono amestar tamién otra actuación musical d'un soníu más contemporáneu.
Polo demás, mui bien, ánimu y p'alantre!

Xarabatu, comparto dafechu lo que dices. Pero paezme qu'ún de los grandes problemes que tienen los partíos pequeños ye la falta xente que trabaye de manera constante. Namás llamar y ser a movilizar xente pa pegar cartelos ye un trabayu impresionante.

Gabis

Con tolos respetos, se que vais matame, pero hailos que tán diciendo coses allegaes a lo que yo voi plantegar. Esta coalición tien toles buenes intenciones del mundu pero namás ilusiona a los que yá taben ilusionaos, namás convence a los que yá teben convencíos. El so techu electoral son 5.000-6.000 votos nel meyor de los casos, más o menos la metada o poco más que los que va sacar Pas-Uras, los sos 10.000-12.000 de siempre. Faigo esta apuesta y creéime que quixere perdela. Más de lo mesmo, proyectos que creen grandes ilusiones y satisfaciones personales ente un garapiellu de xente de bones intenciones pero qu'electoralmente anuncien otru desatre. Anque claro, depués convencerémonos que 4.987 votos son un bon resultáu, como siempre tamién

Gabis

Contador Estadistiques