SUATEA reclama nel 8-S meyorar la llingua na educación

El sindicatu SUATEA manifiesta al traviés d’un comunicáu la so postura pa col Día d’Asturies. Califiquen a los actos programaos pol Principáu de “charanga y pandereta” y reclamen meyores pa la llingua asturiana na enseñanza.

Oficialidá del asturianu y gallego-asturiano, que les places nesta materia “pasen a formar parte de les plantiyes orgániques de los centros, la creación de la especialidá y la convocatoria d'oposiciones”, que nos centros “s’axeiten Planes Llingüísticos que dean un tratamientu integráu y coordináu de toles llingües y onde l’asturianu seya vehicular en delles aries” y que’l currículu d’Educación Infantil recueya l’asturianu; son les reivindicaciones de SUATEA en rellación a la llingua na enseñanza.

Dende’l sindicatu de profesores tamién reclamaron el caltenimientu y potenciación del sector educativu y de los servicios públicos, a la par que salarios y pensiones “dignes pa tolos trabayadores”.

Sátira col Gobiernu
Con sarcástiques palabres, SUATEA criticó tamién que los actos institucionales pasaron “de tambor y gaita a charanga y pandereta”, nel sen de que la celebración d’una gala en cuenta de la tradicional “folixona” ye “más universal, televisiva y esportable a provincies”. Por eso llamen a acabar con “esta situación de decadencia cultural” y afirmen que van participar na concentración del 8-S en Xixón.