La música del país tamién va sonar n’actos alternativos

7 Setiembre, 2010 por Xicu Ariza

Inicie sesión o rexístrese pa espublizar comentarios

A lo llargo d’esta selmana va haber dellos actos musicales alternativos a los programaos pol Gobiernu del Principáu en Ribeseya. N’Avilés, Uviéu, Villaviciosa y Ribeseya van celebrase estos conciertos cola presencia de la música d’Asturies.

Avilés, Uviéu y Villaviciosa van tener esti martes 7 el so Día d’Asturies musical. Na capital va tocar la bandina tradicional El Koku La Mazana, nel chigre La Casa Posafuelles. Va ser a partir de les 23.00 y de baldre. Tamién El Cafetón d’Avilés tien una tarde especial; dende les 19 hores va haber un alcuentru de música tradicional, taller de baille, xuegos populares y ambiente folixeru en xeneral.

D’otra banda, a los soníos más contemporáneos fechos n’Asturies va abellugalos La Bodega II de Villaviciosa. El mecigayu-ska de La Tarrancha, el folk de P’Amusquis y el punk-folk de Vinagre de Sidra va exposigar enriba les tables con empiezu a les diez de la nueche. Tamién nesi mesmu llugar tocará la banda punk xixonesa Odio Visceral, el día 8 a la medianueche.

I Xuntanza de Músicos Astures
Baxo’l nome de “I Xuntanza de Músicos Astures” va celebrase en Ribeseya un festival qu’axunta a un total de 18 grupos de música d’Asturies. Rock, hiphop, hardcore, folk, punk, son dalgunos de los estilos representaos nesti plural eventu entamáu pola Asociación Xuvenil Entaina. Les actuaciones van ser los díes 10 y 11, gratuites y nel Prau de Tereñes.

Comentarios

maxi wrote on 8 Setiembre, 2010:

Divide y vencerás, ye un refrán muy ciertu, y que nos vien al pelu pa díis como esti, onde todos los asturianos tendríemos que tar xuníos, pero non: un per cada llau, y cuanto más lloñe meyor, tal paez que tamos enfadaos. Los politiquinos tienen culpa, pero nosotros más, por seguílos. Asi nos va a los asturianos, y así nos dirá, porque si nun somos a xuntanos pa defender la nuesa tierra ¿que se pue esperar de nos? Nada. Tenemos lo que nos merecemos.