«Rockmería» dedica un programa a la I Nueche Celta de Corao

El programa de la RPA "Rockmería", dirixíu por Xune Elipe, va dedicase esta selmana a la I Nueche Celta de Corao que, celebrada nel añu 1983, foi la primera del país. Esti programa especial va emitise a la medianueche del xueves.

La Nueche Celta de Corao, de la que se celebraron dos ediciones nos años 1983 y 1984, foi’l primer festival con esa denominación que s’entamó n’Asturies, y qu’axuntó a un bon númberu de públicu interesáu pol folk y la música tradicional de lo que daquella escomenzaba a conocese como Mundu Celta.

La repercusión mediática que tuvo foi pergrande, y el so esquema y característiques dio orixe a una tradición de nueches celtes que s’espardieron per cuasi tola xeografía asturiana. Aquel modelu de festival n’entornos afayadizos -el de Corao facíase nun castañéu- diba marcar fondamente los alcuentros posteriores d’esti carácter.

Nesti Rockmería especial va poder sentise tamién una grabación de lo asocedío aquella nueche, procedente d’un documentu sonoru escepcional que recueye parte de les actuaciones. Nesti sen, van recordase pieces del gaiteru Remis Ovalle (nuna de les sos últimes interpretaciones en público), del arpista gallegu Emilio Cao, de los irlandeses Foxes, los bretones Bleizi Ruz y los asturianos Noega y Beleño.

Ignaciu Llope d’invitáu
El programa va tener como invitáu a Ignaciu Llope, escritor, críticu musical y estudiosu del fenómenu musical asturianu y del celtismu modernu. Pertenez al conseyu de redacción de la revista Asturies. Memoria encesa d’un país y ye collaborador d’otres publicaciones como l’Anuariu de la Música Asturiana, Interfolk o Atlántica XXII.