L’Arribada 2010 premia a Roberto González-Quevedo

L’asturlleonés Roberto González-Quevedo foi premiáu por L’Arribada 2010 col “IV Premiu Timón” que se-y concede a autores en llingua asturiana y gallego-asturianu. El premiu va entregase’l prósimu 23 de setiembre en Xixón

Un xuráu integráu por Alberto Álvarez Peña, Vicente García Oliva, Aurora García Rivas, Humberto Gonzali, Jorge Espina, Inaciu Iglesias y Xuan Xosé Sánchez Vicente, alcordó otorgar el IV Premiu Timón, p’autores en llingua asturiana y gallego asturianu, al autor lleonés Roberto González-Quevedo.

Esta distinción, que consiste nuna obra del escultor y ceramista xixonés Jesús Castañón, va entregase nun actu entamáu pal 23 de setiembre, a les 20 hores, nel xixonés Centru Municipal Integráu de L’Arena, nel marcu d’actividaes de L’Arribada 2010. La entrega del gallardón tará acompañada cola actuación del Cuarteto Antolín de la Fuente.

Los ganadores anteriores fueron, en 2007, Nené Losada Rico, en 2008, Xuan Xosé Sánchez Vicente y, en 2009, Manuel García ‘El Galano’.

Trayectoria del premiáu
Roberto González-Quevedo ye un escritor, filósofu, antropólogu y llingüísta nacíu en Palacios de Sil, provincia de Lleón, en 1953. En 1981 algamó’l Premiu de Narraciones Curties de la Diputación d’Asturies (antecesor del Xosefa Xovellanos) col so relatu “Pul sendeiru la nueite”. Ye miembru de númberu de l'Academia de la Llingua Asturiana ocupando anguaño'l cargu de secretariu, y director de la revista “Cultures”, editada pola Academia asturiana y dedicada a temes antropolóxicos y etnográficos.