La Plataforma Unitaria 8-S presenta’l programa del so actu

La Plataforma Unitaria 8 de Setiembre vien de facer públicu cómo va desendolcase l’actu "Pol futuru d'Asturies" convocáu en Xixón. Intervenciones de colectivos asturianos, música asturiana y teatru van garrar el protagonismu.

L’actor asturianu Toño Caamaño va ser l’encargáu de conducir esti actu, que va dar empiezu a les 12.30 nos Xardinos d’El Náutico de Xixon. Nél, van participar representantes de distintos colectivos asturianos que, como declaren dende la plataforma, “van poner voz a les problemátiques sociales, ecolóxiques, culturales y llingüístiques que vive anguaño Asturies”.

La música del país tamién va tener espaciu na concentración. El gaiteru Llorián García Flórez va encargase d’abrir y cerrar l’actu y la cantante de tonada Mari Lluz Cristóbal va dar una actuación ente otros músicos asturianos. Según los convocantes, estes actuaciones musicales “quieren valir de contrapuntu a les celebraciones oficiales previstes pol Gobiernu” pa “dar voz a la cultura d’Asturies”

Manifiestu consensuáu
Pa rematar l’actu va dase llectura d’un manifiestu consensuáu poles distintes organizaciones que formen la Plataforma Unitaria 8 de Setiembre. Nél, sorráyase “la necesidá de crear nuevos espacios políticos pa entamar el nuevu ciclu que representa esti actu unitariu”, afirmen dende la Plataforma.

D’otra miente, l’actu sigue sumando’l sofitu d’organizaciones. El sindicatu SUATEA, el colectivu Entemecer y la formación llocal de Muros del Nalón S. XXI tán acabantes de confirmar la so presencia na concentración, que s’axunta hasta’l momentu a la de la Corriente Sindical d’Izquierda, Bloque por Asturies, UNA, Fai!, Andecha Astur, UICA, Asturianistes por Nava y Más Corvera.