Palacios y Zapico afirmen que’l 8-S “ábrese un ciclu políticu nuevu”
|
6 Setiembre, 2010 por Xicu Ariza
- Inicie sesión o rexístrese pa espublizar comentarios
Ábrese una puerta a la esperanza. Asina lo plantearon nuna rueda de prensa conxunta Rafa Palacios y Faustino Zapico, portavoces del BA y UNA. Nella reflexaron el so apoyu a la concentración del 8-S y la necesidá d’abrir otru ciclu políticu.
La primer rueda de prensa conxunta ente’l Bloque por Asturies y Unidá Nacionalista Asturiana manifestó la voluntá d’estes organizaciones d’abrir un “procesu de rexeneración democrática” que “airee la política d’Asturies” y que de rempuesta a la “situación llamentable del país”, como señaló Rafa Palacios.
Nesa postura, ambes organizaciones expresaron el so apoyu a la concentración que la Plataforma Unitaria 8-S convoca en Xixón. “El 8 de setiembre ye una bona xornada pa empezar a reivindicar qu’otra Asturies ye posible”, señaló Faustino Zapico a la par que defendía “axuntar tolos esfuerzos posibles na mesma dirección”.
“Depués del 8 setiembre vendrá el 9 y abrirase un nuevu cursu políticu que va culminar nunes elecciones nes qu’esperamos que podamos contar con una alternativa real al actual estáu de les coses”, insistó Zapico. Palacios defendió tamién esa postura, señalando que “a partir del 8 de setiembre ábrese una puerta a la esperanza”.
Movilización contra la situación actual
Les declaraciones de los dos representantes de la izquierda nacionalista nun fueron escases en cuantes a crítiques pa cola situación actual d’Asturies. Faustino Zapico entamó la so exposición denunciando los recortes, el paru, los ERE, el “marafundiu de perres n’obres faraóniques”, “l’esfarrape” ecolóxicu y “l’arrequeximientu de toles señes d’identidá”.
Rafa Palacios tamién faló de la necesidá de “acabar con esi réximen impuestu pola oposición y el gobiernu” y calificó a los actos institucionales del 8 setiembre como les “celebraciones de despedida d’Areces”. Como rempuesta, el portavoz del Bloque por Asturies y el de la UNA llamaron a la movilización.
“La rempuesta tien que tener munches vertientes: movilización social, movilización sindical, movilización política”, defendió Zapico, mentantu que Palacios llamó a aprovechar el 8 setiembre pa “salir a la cai a reivindicar el futuru que queremos p’Asturies”.
Ensin información nueva sobre’l actu
D’otra banda, nengún de los dos portavoces fizo nueves aportaciones rellaciones con cómo va desendolcase la concentración del miércoles en Xixón, anque aseguraron que la plataforma convocante emitiría un comunicáu nel qu’informará d’ello.
Tampoco falaron de nueves organizaciones que sofiten l’actu, sacante de les yá conocíes: Bloque, UNA, Andecha Astur, CSI, UICA, APN, Más Corvera y Fai!. Nesti sen, Palacios señaló que “cada organización tresladará a los medios, colos sos medios, l’apoyu a la convocatoria”. Daqué que BA y UNA fixeron conxuntamente güei.
Efrén d'Andrés
Lo + visto de la selmana
Comentarios
Mas de lo mesmu......de xuntanza nada!!! cadun tirando pal so llau .
Non ye esa la alternativa pa ASTURIES, tiranse unos a los otros los votos ,y los benificios los partidos de Madri riendose ...Mas non ye!!!
N'una alternativa non val el collor , si non la meta enxunta de toos que, non piensen unos pocos que, la politica pa Asturies, solu se fai de la ezquierda , non ye asina. Asturies va facese cuando toos caminemos baxu so bandera!!!
Nun pescancio la mitá de lo qu'escribes, pero esto ye mui bona noticia, y queda tiempu que vaya la cosa xuntando a más xente. Ya tamos cansaes de proyetucos que nun van a nengún llau, y hai qu'animar a los que se ponen a trabayar pa facer daqué prestoso en política, com paez esto.
Lo que val ye facer un proyeutu que podamos votar con posibilidaes, si se pretende eso tará bien fechu. A ver si deprendieron y deprendimos de tantos años nel ermu de la política. Muncha xente queremos una cosa seria y queremosla ya, rapaz.
Puxa Asturies!
Pos creo que entiendes tou,como yo entiendo lo tuyu....falsedaes pa otru llau!!!!
Ye una noticia per mala ..Onde ta esa xuntanza?? Ye iso una alternativa p'Asturies???non ye
Mas de lo mesmu ,tu mesma sabes que non caminando xuntos nada se fai.Si non lo crees los votos van cutati-lo.
Asturies ye llabor de toos que piensen un garrapiellu que,solu ellos poden facer Asturies ,ta fora de tou llugar,Asina andamos n'Asturies ..Con idees absurdes non diremos lloñi!!
Yo quiero ser positivu y creo qu'esti ye'l camín pa que'l nacionalismu espoxigue y entre na sociedá. El camín de los actos xunitarios, el camín de les collaboraciones ente partíos, asociaciones, sindicatos. El camín de los mensaxes únicos, claros, concisos.
Nun debiera faltar naide y ye claro que falta'l partíu que más votantes asturianistes tien, el PAS. Ellos ya amosaron la so opinión. Agora, la sociedá asturiansita tendrá de valorar esti fechu.
Polo demás, ha de quedanos claro a toos qu'equí nun sobra naide pero falta xente.
Entá queda tiempu.
«Faigo por vete, peles cais, nos lletreros... faen por borrate, de los mios güeyos y manes... pero nun son quien a ello»