Areces califica de “poco creíble” l’altu’l fueu d’ETA

El Presidente del Principáu, Vicente Álvarez Areces, vien de valorar la declaración que fizo ETA’l domingu de poner fin a les acciones armaes. Areces señaló qu’hai que tomala con “cautela” y la definió como “poco creíble”.

“El nivel d’esixencia debe ser l’abandonu definitivu de les armes y la disolución de la banda”, declaró’l Presidente de Principáu. Al empar, señaló que les palabres d’ETA hai que tomales “cola necesaria cautela teniendo en cuenta lo que sucedió históricamente”, mientres que s’opuso a “cualquier plantamientu que suponga negociar con una banda terrorista”.

Areces, amosó tamién el so apoyu a les Fuerces de Seguridá del Estáu que “van continuar cola so actuación contundente” como “únicu camín pa que se de una verdadera solución democrática al históricu conflictu del País Vascu”.

“L’anunciu realizáu, dientro de la so ambigüedá, resulta poco creíble pa pensar nuna solución definitiva”, sentenció’l Presidente del Principáu.

Nuevu altu’l fueu
“Non desendolcar acciones armaes ofensives”, foi la decisión tomada por ETA va dellos meses y tresmitida’l domingu 5 de setiembre nun videu unviáu a la BBC y al diariu Gara. Na declaración fálase d’un nuevu altu’l fueu cola voluntá de “acordar los mínimos democráticos necesarios pa entamar el procesu democráticu”.

Les palabres d’ETA fueron tomaes con escepticismu en too’l espectru políticu español, que ven insuficiente la postura de la organización armada y piden l’abandonu total de les armes. Mentantu, observadores internacionales como Brian Currin y Gerry Adams y la mayoría del nacionalismu vascu, vieron positiva la declaración y pidieron responsabilidá al gobiernu español y demás axentes políticos.