L’asturianismu prepárase pal 8-S

Yá entamó la cuenta atrás pal 8 setiembre y l’asturianismu ta presentando los sos actos pa celebrar el día del país. Xixón, Uviéu y Carreño son los llugares con convocatories alternatives a les programaes pol  Principáu en Ribeseya.

La recién creada “Plataforma Unitaria 8 de Setiembre” anunciaba esti martes la celebración  d’una concentración nos Xardinos del Náutico de Xixón pa “dar una rempuesta coordinada y lo más unitaria posible énte'l modelu d'Asturies que'l gobiernu asturianu va celebrar el próximu 8 setiembre”. A les 12.30 va arrancar esti actu, convocáu baxo'l llema "Pol futuru d'Asturies", que nagua por construir “una llamada en positivu al optimismo, a la recuperación de l’autoestima y a la defensa de la nuestra economía, cultura y mediu ambiente”.

Bloque por Asturies y UNA son les organizaciones polítiques que formen parte d’esta “Plataforma Unitaria 8 de Setiembre” xunto a movimientos sociales, sindicales y ciudadanos a nivel individual. D'otra miente, Andecha Astur ta acabante de facer pública una nota de prensa na qu’afirmen que tamién va participar nesti actu.

Esta última organización declaró al empar que va sumase a la manifestación que la iniciativa “Democracia p’Asturies” convoca a les 13 hores na Estación del Norte d’Uviéu. “Facer un día de reivindicación nacional y social y denunciar la situación pre-democrática que carez Asturies” ye l’oxetivu d’esta movilización na que tamién van tar presentes la organización de mocedá nacionaliego Darréu y la Corriente Sindical d’Izquierda.

Unión Asturianista en Carreño
Per otru llau, la coalición Unión Asturianista, formada por PAS y URAS, va celebrar el día de la nación asturiana en Candás. Un actu políticu a les 13.30 nel Monumentu a la mina y a la mar, asitiáu na Escalera la Galbiana, y una xinta de xermandía a les 14.30 nel Restaurante La Fonte, son los actos programaos polos asturianistes.