Iris Díaz Trancho presenta ‘Mio ma, la pirata’

La escritora xixonesa Iris Díaz Trancho va presentar la so novela infantil “Mio ma, la pirata”. Ilustrada por Gloria Caamaño y editada por Suburbia Ediciones, la presentación va dase’l prósimu 11 de setiembre na FNAC de Parque Principáu.

Como'l títulu indica Mio ma, la pirata, ye una hestoria de pirates anque atípica: Barba Negra lleva un restaurante y Barba Roxa ye xastre. La ma del nenu protagonista sigue surcando los mares buscando barcos que prindar y ayalgues escondíes. Con ayuda de la perra Pulga entamen un viaxe a Madagascar en busca del mayor tesoru de toos.

Esta obra supón l’estrenu de la editorial asturiana Suburbia Ediciones na lliteratura infantil, cola colección “Camín de bree”. La novela va presentase’l sábadu 11 de setiembre a les 19 hores, nel Clú Infantil de Parque Principáu.

Faciendo lliteratura infantil
 Iris Díaz Trancho (Xixón, 1981), ye una de les nueves voces de la narrativa asturiana. Especializada en lliteratura infantil, con “La caxa de cristal” ganó’l Concursu de Llectures pa Rapazos de l’Academia de la Llingua en 2004 y con “Sedna”, llogró en 2005 el primer premiu del Concursu de Cuentos Curtios de la Tertulia Cultural ‘El Garrapiellu’. “La neña de les trences al reves” (Trabe, 2006) ye otra de les sos noveles.