Corbacho va dexar el Ministeriu de Trabayu pa dir nes llistes del PSC

El ministru de Trabayu y Inmigración, Celestino Corbacho, va dexar pronto’l Gobiernu de José Luis Rodríguez Zapatero. L’oxetivu del políticu del PSOE ye dir nes llistes del PSC nes elecciones catalanes de la seronda.

Corbacho comunicó la so intención de volver a la política catalana nun primer momentu al líder del PSC y presidente de la Generalitat, José Montilla, nuna xunta'l pasáu día 4 d'agostu. Darréu, comunicólo al xefe del Executivu español y líder del PSOE.

El procesu pa la designación de Corbacho va empezar esti vienres pela nueche cola propuesta d'incluyilu nes llistes per parte de los trés agrupaciones llocales del PSC en L'Hospitalet del Llobregat (Barcelona), población na que'l ministru foi alcalde mientres 14 años.

La propuesta va ratificiase'l próximu llunes nel conseyu de la federación de L'Hospitalet, pa dempués elevase al Conseyu Nacional del partíu en Cataluña, encargáu de ratificar les llistes electorales.

El que fuera tamién presidente de la Diputación de Barcelona va ocupar un puestu destacáu na candidatura de Montilla, posiblemente'l númberu trés, dao que'l segundu puestu previsiblemente va recayer en Laia Bonet, agora secretaria del Govern.

Corbacho va siguir nel gabinete de Zapatero hasta la güelga xeneral prevista pal próximu 29 de setiembre, pa evitar 'quemar' al futuru titular de Trabayu. La salida de Corbacho podría dir en paralelo a la de la ministra de Sanidá y Consumu, Trinidad Jiménez, si ésta gana les primaries nel Partíu Socialista Madrilanu (PSM).

El presidente Montilla va anunciar la próxima selmana la fecha de les elecciones catalanes, que van poder ser el 28 de payares o a primeros d'avientu.

Trayectoria nel PSC
El gruesu de la carrera política de Corbacho (Badajoz, 1949) foi como alcalde de L'Hospitalet, la segunda ciudá de Catalunya y principal feudu del 'cinturón coloráu' barcelonés, una de les grandes fontes de votos, tanto del PSC como del PSOE.

Nesti momentu, preside la Federació de L'Hospitalet del PSC, ye secretariu nacional del partíu y miembru del Comité Federal del PSOE. De 1992 a 1999 yá foi diputáu del Parlament, y tamién foi presidente de la Diputación de Barcelona y de la Federación de Conceyos de Catalunya (FMC).