El Bloque por Asturies critica la política económica del Gobiernu

El Bloque por Asturies vien de calificar de “fracasada” la política económica del Principáu. Consideren que’l aumentu del paru n’agostu en 1281 persones amuesa la “incapacidá pa crear empléu estable y de calidá” y ven un futuru “esmolecedor”.

“Un escenariu murniu, negativu y esmolecedor, con más paru, más precariedá y más crisis”, asina define’l Bloque por Asturies la coyuntura llaboral nos prósimos meses. Afirmen tamién qu’esta situación va medrar cola aplicación de la Reforma Llaboral española, los recortes n’inversión pública y l’aplicación de la Llei d’Axuste aprobada nel Parllamentu asturianu.

Según los nacionalistes “les medides económiques tomaes polos gobiernos d’España y Asturies nun avancen na creación d’empléu”, amosando’l so esmolecimientu pola xuba del paru n’Asturies nun añu nun 6’61%, lo que son casi 73.000 persones en paru en tola Comunidá Autónoma.

Sobre la contratación
El Bloque por Asturies calificó tamién de “mui grave” que los contratos indefinidos baxaran nun 25’98% en rellación a xunetu y los temporales medraran un 10’79% nun añu. Según el BA, esto “confirma l’aumentu de la contratación inestable y precaria”.