Entama’l Mediu Güeyu Festival en Villaviciosa

La creación audiovisual tien la so capital en Villaviciosa esti fin de selmana col Mediu Güeyu Festival. Esti eventu va axuntar un concursu de curtiumetraxes asturianos, un taller de cine, proyecciones d’artistes independientes y música en vivo.

Nacíu del interés pol cine d’un grupu de mozos de Villaviciosa, el Mediu Güeyu Festival amesta creación audiovisual de dientro y fuera d’Asturies ente’l 2 y 5 de setiembre. El platu fuerte del eventu ye’l concursu de curtiumetraxes nel que participen más de 200 obres.

Amás, súmense a esta primer edición del festival delles proyecciones: per un llau, les de videoarte internacional na Fundación Cardín; y pel otru, les d’obres d’artistes independientes nel Teatru Riera. Tamién van proyectase los curtiumetraxes seleccionaos que participen nel concursu de curtios.

El programa complétase col taller cinematográficu “De la idea a la pantalla” y coles actuaciones musicales nel chigre La Bodega II del guitarrista rock Rafa Kas el sábadu y, el domingu, de la formación indie Pantano.

Dar voz a la mocedá
“Apelamos a la creatividá, a la denuncia social, a la esperimentación y a la puesta en valor de los nuesos desfamaos valores culturales” señalen dende la organización Mediu Güeyu, al empar que denuncien “la inesistencia d'oportunidaes, de medios, para que pueda ser oyida la voz de los mozos d’Asturies”.