La Coordinadora Ecoloxista insiste n’abandonar la incineradora

Mañana’l Principáu va presentar los actos de la Selmana Europea de la Prevención de Residuos. Acordies a esto, la Coordinadora Ecoloxista d'Asturies insiste n’abandonar el proyectu de incineradora de residuos y apostar por reciclaxe.

Al traviés d'una nota de prensa, repiten que lo qu'hai que facer ye “trabayar nes polítiques de los trés erres: amenorgar, recuperar y reciclar”. Llamente amás qu'Asturies tea "a lo cabero" de les tases d'amenorgamientu de residuos y de reciclaxe d'España según los datos del Ministeriu de Mediu Ambiente.

Asturies tien una media del 10,7% de reciclaxe, frente a otros llugares onde yá consiguen el 30%. “Hai conceyos n'España con  tases reales del 82% de reciclaxe. Hai países d'Europa con tases yá del 70% mentanto equí nun llegamos al 10%", señalaron. Polo qu’opinen qu’equí “nun tenemos nada que celebrar”, en rellación a que’l Principáu presente los actos de la Selmana Europea de la Prevención de Residuos.

L'actual proyectu de Cogersa, col sofitu del PSOE y del PP, de poner la segunda mayor incineradora d'España, a xuiciu de Coordinadora, llindaría cualquier proyectu d'amenorgamientu y de reciclaxe al quemar el 80% del total de residuos urbanos producíos agora al añu, polo nun quedaría nada pa reciclar y nada p'amenorgar, "sacantes que se traigan otros residuos d'otres rexones pa quemar", sentencien.

Amás, consideren que si quemen too como tienen previstu sería daqué que diría contra toles directives europees esistentes y contra los criterios de sostenibilidá.

Alternatives a la incineración
Pa camudar esta situación actual planteen que “nun hai una única solución, sinón una combinación de delles midíes, que xeneren empléu, producen materies orgániques, dan valor añedíu al procesu y son ambientalmente más sostenibles que la incineración, qu'enriba de peligrosa ye la más cara”.
   
Asina, apuesten pol amenorgamientu y el reciclaxe, amás d'informar y sensibilizar como una midida de futuru pa concenciar a la población. Tamién insisten en que “hai que tomar midíes pa facer cumplir les ordenances de llimpieza y los decretos que desenvuelvan les polítiques de reciclaxe”.