Rock y folk celta suena'l miércoles 1 en Xixón

Xixón enllenase esti miércoles 1 de rock y folk de raigañu. De la mano d’Algamar Producciones van aportar n’esclusiva a Asturies The Mahones, banda referencial de punk-rock celta. Actúen tamién los asturianos Sambre y Mezá.

Formaos en 1990, The Mahones ye’l grupu canadiense más destacáu del estilu conocíu como paddy-rock, un amiestu ente’l rock y el folk de calter célticu. Con ocho trabayos discográficos a les sos espaldes, aporten n’Asturies n’esclusiva pa presentar la xira del so 20 aniversariu.

Nel escenariu van acompañar los xixoneses Sambre y Mezá, de Bual. Sambre, palabra asturiana significa ‘pena’, ‘tristura’; ye tamién el nome d'un grupu de Xixón creáu a principios del 2007. Con una sonoridá de base rock, a la que sumen importantes influyencies folk, y cola llingua asturiana como forma d’espresión, esta banda ta acabando la xira presentación del so debú discográficu “Na solombra”.

Per otru llau, Mezá ye ún d’esos grupinos musicales de xente mozo de la llamada “Tercera
Xeneración” del folk asturiano. La frescura y el bon humor son les claves d’esti conxuntu, afincáu nel occidente d’Asturies, que lo único que busca ye recuperar parte de la tradición y entregala, renovada y con un aire nuevu d’autenticidá del sieglu XX

Nel Savoy Drinks&Music
Esti señaláu conciertu pa los amantes del rock y folk del Arcu Atlánticu va celebrase esti miércoles 1 de setiembre na Sala Savoy de Xixón. Entamáu pola productora asturiana Algamar Producciones, les actuaciones van dar empiezu a les 20 hores, con un preciu únicu de diez euros.