El Bloque lleva a la Xunta’l problema colos Rayos X de Llanes

El Bloque por Asturies, al traviés del so grupu parllamentariu, ingresó nel rexistru de la Xunta Xeneral les preguntes al rodiu’l sistema de Rayos X de Llanes. Dende l’A.V.V de Celoriu “La Hoguera” agradecen la so “sensibilidá” y “apoyu” col casu.
 

El Dispositivu de Rayos X lleva 17 años años instaláu nel Centru Salú de Llanes, pero enxamás s’usó. Roberto Colunga, diputáu y portavoz del Grupu Parllamentariu Mestu, vien de llevar esta problemática a la Xunta Xeneral, con ocho entrugues empobinaes al Conseyeru de Salú.

L’activación del sistema de Rayos X cuenta yá con más de 7.000 firmes d’apoyu, tres de que l’Asociación de Vecinos y Vecines de Celoriu “La Hoguera” púnxera en marcha la iniciativa. “Ye viable, económico, adecuao, xustificao, eficaz, necesario”, declaren dende’l colectivu sobre’l equipamientu sanitariu.

La media d’edá de la población del territoriu, la dispersión del espaciu afectáu, y la falta de tresporte públicu na fastera, son otros de los argumentos espuestos por “La Hoguera”, polo qu’esixen la puesta en marcha d’esti “serviciu sanitariu fundamental, más importante qu’otros caprichos suplerfuos nos que se pierden les perres de toos”.

Apoyu de Colunga al FIO
D’otra miente, Roberto Colunga vien d’unviar una carta a la Conseyera de Cultura, Mercedes Álvarez, na que-y encamienta a convertir el Festival Intercéltico d’Occidente en Fiesta d’Interés Turísticu Rexonal. “Esti ye ún de los referentes culturales del occidente asturianu y lleva catorce años trabayando por averar la cultura a Tapia”, argumenta’l diputáu del Grupu Mestu.