La "Plataforma 8 de setiembre" convoca un 8-S alternativu en Xixón

|

Xixón acoyerá esti 8 de setiembre los actos de la Plataforma 8-S, qu'axunta a dellos colectivos políticos, sindicales y ciudadanos y que quier dar una respuesta a los actos oficiales. Bloque por Asturies y UNA son delles de les organizaciones que sofiten l'actu.

Depués de delles reuniones durante esti branu nes que foron perfilándose los detalles, delles organizaciones y colectivos apautaron una convocatoria conxunta pa dar una respuesta a los actos oficiales que'l gobiernu asturianu entama en Ribeseya.

La idea de la convocatoria "ye dar una rempuesta coordinada y lo más unitaria posible énte'l modelu d'Asturies que'l gobiernu asturianu celebrará el próximu 8 de setiembre, que se basa na negación de la capacidá d'Asturies p'autogobernase, na negación de la capacidá del país pa salir de la crisis, y la negación  la capacidá d'Asturies para salir de la crisis económica y na negación y el despreciu de la nuestra cultura y  la nuestra historia".
 
La Plataforma pretende axuntar al mayor númberu de colectivos políticos, sociales y ciudadanos pa dar un mensaxe reivindicativu y críticu, con una llamada a la construcción "d'un nuevu discursu y una nueva práctica basada nes posibilidaes de la sociedá asturiana que permita a Asturies sobreponese al actual modelu gris que lleva a la desconfianza nes capacidaes propies".
 
El formatu de la convocatoria faise cola mayor flexibilidá posible pa fomentar la participación, polo que los convocantes esperen a lo llargo d'esta selmana dir recibiendo apoyos. Bloque por Asturies y UNA  ya confirmaron la so participación y espérase que se vayan conociendo a lo llargo d'esta selmana más apoyos de partíos, sindicatos y colectivos.
 
El lema escoyíu pa la convocatoria ye "Pol futuru de Asturies" que pretende ser una llamada en positivo al optimismu, a la recuperación de la autoestima y a la defensa de la identidá, cultura y mediu ambiente d'Asturies.

Comentarios

Non creo que facer iso vaya ser buenu pa Asturies,non seria meyor facer les coses xuntos ,pero revindicando les coses mal feches.
Como camudar los retulos en Ribesella que, fixo la tomonimia, i ta tou como taba...Que se festexe en Xixon non va llevar Asturies mas lloñi,asina non se abren los güeyos a la xente .
Lluchar nel sitiu ,glayar por lo mal fechu ,por exemplu faria mas efectu pa la politica contra lo asturianu dirixia pol gobiernu!!!

Paezme que'l simbolismu d'esti actu va muncho más allá del llugar onde se celebre.
A mí personalmente paezme interesante, y cásique milagroso visto lo visto los otros años, qu'entamemos a ponenos d'alcuerdu.
Cuento con que tien de llamanos a la esperanza, y anque vendrán los del "pero", a mí, nun entamu, y a la espera de ver qué organizaciones van sumándose, paezme una bona noticia.

Contador Estadistiques