La torna al colexu costará 770 euros de media n'Asturies

La torna al colexu costará 770 euros de media nel Principáu d'Asturies, perbaxo de los 820 euros de la media n'España, según informó la Federación d'Usuarios Consumidores Independientes (FUCI).
 
   Según un estudiu d'esta organización, el gastu mediu nun centru públicu asturianu ye de 480 euros (frente a los 512 de media nacional), 730 euros si s'opta por un concertáu (774 euros de media n'España), y 1.100 euros nun priváu (1.174 euros de media n'España).
 
   Los precios n'Asturies l'añu pasáu yeren un pocoñín menos, con un coste mediu de 738 euros. En cuantes a los centros públicos, 455 euros, por 690 nos concertaos y 1.070 nos privaos.
 
   L'informe foi fechu tomando como referencia 200 colexos públicos, concertaos y privaos del terren nacional, pa conocer cuál ye l'impactu económicu de la torna al colexu pa les families con fíos n'edá escolar.
 
   A nivel nacional, les families españoles van tener qu'apechar un coste mediu de 820 euros por fíu, ye dicir, un 6,2 por cientu más que'l pasáu añu, una medría que, según la presidenta de FUCI, Agustina Laguna débese "a la xubida del IVA en dos puntos que cabo con la constante xubida del preciu de los carburantes dieron llugar a aumentu nel coste de tornar a les aules que va perxudicar más entá les maltreches economíes de miles d'españoles".
 
   L'uniforme/ropa, incluyendo tamién el calzáu, supón un de los gastos que más encarez a los padres la torna al colexu de los sos fios. Asina, nos centros públicos camienten que'l gastu en ropa ye unos 110 euros, cifra que se dobla nel casu de los concertaos y que xube hasta los 284 € en los privaos.
   La matrícula ye otru los epígrafes que más encarez la torna a les aules. Tanto nel casu de los centros públicos como los concertaos el coste ye cero, anque Agustina Laguna recuerda a los padres "que tengan en cuenta pa calcular los sos gastos que dellos centros concertaos disfracen esti conceptu llamándolu gastos d'aniciu de cursu qu'incluyen conceptos como secretaría, informatización, xestión, sobre de matrícula, comunicaciones ... y qu'en nengún casu suelen baxar de los 200 euros". Mentanto, nos colexos privaos el coste mediu asítiase nos 265 euros.
 
LLIBROS DE TESTU
 
   La FUCI analizó tamién el coste de los llibros de testu en función de la etapa educativa na que s'alcuentre'l neñu y tomando como referencia los precios de delles editoriales. A pesar de contar con una IVA superreducíu, esperimenten una xubida del 3,8% no tocante al añu anterior lo que supón un desembolsu mediu de 190 euros.

No tocante al material escolar como mochiles, cuadernos, carpetes o bolígrafos ... supondrá 50 euros nos colexos públicos, 120 nos concertaos y 125 nos privaos.
 
   El coste total de la comida esperimenta una pequeña xubida qu'alluga'l coste en 160 euros nun centru priváu, el doble que nun públicu, mientres que nun concertáu supón 114 euros.

A lo cabero, el tresporte, que van tener que pagar aquellos escolinos a los que los padres nun puedan llevalos y recoyelos, supón una media de 115 euros mensuales, dependiendo de si'l colexu ye públicu (80 euros), concertaos (115) o priváu (150).