UNA pide al Gobiernu asturianu un cambiu na política ganadera

Unidá Nacionalista Asturiana plantega la necesidá d’un cambéu del modelu ganaderu “que tien de ser lideráu pol gobiernu asturianu énte’l cambéu de les subvenciones” de la Política Agraria Común de la UE, según señala nun comunicáu.

El portavoz de la formación nacionalista, Faustino Zapico, plantegó la necesidá de “camudar el modelu de desendolcu ganaderu n'Asturies, que vien obligáu pol cambéu nes polítiques comunitaries agraries y l'acabu de les subvenciones a la lleche pal 2013”, añadiendo que "necesitamos un modelu ganaderu rentable y eficiente que camude'l modelu de subsidios por un modelu que xenere beneficios" yá que "el seutor de la ganadería nun ha quedar ancláu nel inmovilismu sinon sumar a los seutores tradicionales les formes de producir nueves".

Según la UNA les llinies básiques de trabayu han ser les de “llograr esplotaciones ganaderes de mayor dimensión baxo la forma cooperativista, aumentar la integración vertical y horizontal del seutor pa torgar que los intermediarios aumenten los precios y al empar que baxen el preciu que se-yos paga a los ganaderos pola lleche y dotar al seutor de la infraestructura necesaria pa iniciar procesos de diferenciación (denominación d'orixe), trabayar en productos llácteos manufacturaos y la internacionalización del productu dau la gran calidá del mesmu” lo que permitiría “esportar productos manufacturaos d'esta materia prima”.

Unidá Nacionalista Asturiana indica que debe proporcionarse a los ciudadanos de los núcleos rurales “los mesmos derechos d'accesu a la teunoloxía y a los servicios públicos pa que sirva d'encontu pa desendolcar les sos actividaes d'una forma más competitiva”.