Nueche Ska-Rock en Xixón con Skama la Rede y Dakidarría

Esti sábadu 28 d'Agostu tien llugar na Sala Savoy de Xixón (C/ Pelayo, 2), a partir de les 22 h. un conciertu de ska-rock entamáu pol sellu asturianu Xunca Records y nel que van participar los asturianos Skama la Rede y los gallegos Dakidarría.

Los primeros en saltar al escenariu van ser Skama la Rede, que tocarán por primer vez en Xixón dende l'apaición de “Ye too mentira”, el so tercer discu d'estudiu asoleyáu de la mán, como los dos anteriores, del sellu L'Aguañaz. Esti conciertu va servir tamién pa que'l públicu xixonés conoza les novedaes na formación d'esta yá veterana banda dientro'l panorama musical asturianu y n'asturianu.

Darréu, y por cuarta vez n'Asturies, tercera de la mán de Xunca Records, los gallegos Dakidarría faerán movese a los y les asistentes al ritmu de los nuevos temes recoyíos en “Realidades alienantes”, tercer trabayu d'esta banda orixinaria de Nigrán, en Pontevedra. El conciertu de Dakidarría en Xixón enmárcase na xira “La realidad es mentira tour”, na que, aparte d'Asturies, van llevar los sus ritmos ska, reggae y rock a países como Catalunya y Portugal.

La entrada podrá mercase namás en taquilla y tendrá un preciu de 6 euros. Y anque dambos grupos coinciden, curiosamente, n'aplicar de “mentira” a tolo que nos arrodia, lo cierto ye que'l prósimu día 28 lo que nun va ser mentira ye que la bona música y la fiesta van tar aseguraes nesti conciertu.