El Bloque por Asturies da rempuesta a les “agresiones” de Fomentu

El Bloque por Asturies vien de criticar “la falta de respetu a Asturies” y “los engaños” del ministru de Fomentu José Blanco. Los nacionalistes van presentar una iniciativa na Xunta Xeneral pa responder “a les permanentes agresiones contra Asturies”.

Pal Bloque por Asturies los anuncios de José Blanco sobre infraestructures son “cortines de fumu pa esconder la realidá: la so falta de compromisu con Asturies”. Denuncien amás la so “nula voluntá” en concretar un calendariu definitivu y el poner per delantre la ciudadanía “los intereses electorales del PSOE en Cataluña y Andalucía”.

Sobre l’actitú del Gobiernu asturianu el Bloque opina que “nun se pue consentir que calle, intente xustificar lo inxustificable y amuese una actitú de complicidá vergoñosa”. Amás, esixen-y que “se ponga en pie” y “defienda realmente los drechos d’Asturies énte’l Gobiernu socialista de Madrid”.

Iniciativa na Xunta Xeneral
D’otra miente, la organización nacionalista va tomar medides al traviés del so Grupu Parlamentariu. Anuncien que van presentar una iniciativa na Xunta Xeneral “pa que toles fuercies polítiques den una rempuesta conxunta y unitaria a les permanentes agresiones contra Asturies del Gobiernu de Madrid”.

Quieren que’l Parlamentu asturianu esixa una rempuesta “clara, directa y contundente” contra les medides polítiques españoles perxudiciales  p’Asturies.