La RTPA niega informes sobre la marxinación del asturianu

|

La XDLLA denuncia que la dirección de la RTPA ta “en rebeldía contra les instituciones democrátiques”, al llevar más de cuatro meses ensin entregar a la Procuradora Xeneral d’Asturies los informes sobre la marxinación del asturianu nel ente públicu.

Va dellos meses la Xunta Pola Defensa de la Llingua Asturiana entamó una campaña per Internet pa pidir a la dirección de la RTPA más programación n’asturianu, horarios y conteníos más dignos y el respetu a la toponimia oficial. Más de 5.000 persones sofiten hasta’l momentu esta iniciativa que se completó cola presentación d’una quexa oficial énte la Procuradora Xeneral d’Asturies.

La función de la Procuraduría ye la defensa de los derechos de la ciudadanía asturiana y el cumplimientu de les disposiciones llegales d’ámbitu autonómicu, estatal y européu. A petición de la XPDLLA, esti organismu solicitó per dos vegaes los informes sobre’l tratu de la llingua asturiana na radiotelevisión pública y hasta'l momentu nun tuvo rempuesta.

“Pedimos una actuación contundente dende les instituciones encargaes de velar polos derechos cívicos”, afirma'l colectivu prollingua, al empar que critica que la RTPA ta incumpliendo la llexislación vixente al negar la entrega de la información solicitada públicamente.

La campaña sigue abierta
D’otra miente, la Xunta pola Defensa de la Llingua Asturiana quier dar les gracies a toles persones que participaron nesta iniciativa pa pedir un tratu más dignu pa col asturianu na RTPA y anuncien que la campaña sigue activa.

 

Contador Estadistiques