SUATEA critica'l procesu de concesión de places a interinos

El sindicatu asturianu d’enseñanza, SUATEA, denuncia’l procesu d’adxudicación de places de profesoráu interinu pal cursu 2010/2011. Fallos na ellaboración de listes, recortes y precarización son les principales crítiques.

 
“Peor imposible”; asina califiquen dende SUATEA les adxudicaciones d’interinidades  de cara al nuevu cursu. El sindicatu apunta que na ellaboración de llistes cometiéronse “inaceptables errores”, daqué que repercutirá negativamente nun colectivu profesional que supón el 15 % del profesoráu asturianu.

Más fallos diéronse col sistema informáticu; la Conseyería anunció que daría prioridá a la petición de destinos per Internet y que’l plazu finaba a les 24 hores del miércoles, pero la dixitalización del procesu nun furruló hasta güei pela mañana. Esto llevantó la “indignación y desesperación” de los miles d’aspirantes a les places que, como afirma SUATEA, s’empobinaron esta mañana a reclamar al Rexistru d’Educación.

La precarización ye otra de les crítiques del sindicatu d’enseñanza. Tacha de “brutal” el recorte na ufierta pública d’estes places profesionales, al baxar nun 17% en rellación al caberu añu. Amás medren les medies xornaes, que pasen d’un 33% a un 42%. Too esto se traduz, según SUATEA, en “precarización, aumentu del desempléu ente los docentes y pérdida de la calidá del sistema educativu”.

Esta suma de recortes y irregularidades faen que SUATEA amuese la so desilusión pa con Herminio Sastre, nuevu Conseyeru d’Educación tres la marcha de Riopedre, y denuncie’l mal entamu de la recién creada Dirección Xeneral de Planificación Educativa y Personal Docente.

Crítiques del Bloque por Asturies
El Bloque por Asturies tamién espresa la so preocupación hacia la situación del profesoráu interinu. Dende la formación nacionalista refuguen les irregularidades nel procesu d’adxudicación y “la mengua de cerca 500 places de maestros interinos pa esti ciclu”.