Más de 1200 firmes d’apoyu podríen convertir al FIO en Fiesta d’Interés Turísticu

El Festival Intercéltico d’Occidente zarró la so XIV edición con ésitu de participación y públicu. Amás, esti eventu cultural yá tien el sofitu de más de 1200 persones pa que la Conseyería de Cultura la convierta en  Fiesta d’Interés Turísticu Rexonal.
 

1223 son el númberu de persones que roblaron hasta’l pasáu llunes 23 pa que’l FIO sea Fiesta d’Interés Turísticu Rexonal. La campaña va caltenese abierta toa esta selmana, pudiéndose roblar al traviés de Facebook, na Casa’l Conceyu y en dellos llocales de Tapia.

“Esto amuesta que’l Festival tien muncho sofitu y tien que siguir p’alantre”, declaró Martín F. Cascudo, director del festival, sobre esta iniciativa, a la par que destaca que “surdió d’un mou improvisáu”.  

Cascudo aprovechó tamién pa facer balance de la décimocuarta edición del FIO. “Foi la edición con más xente y la participación del público foi notable en toles actividaes”, fueron les palabres del director p’agradecer l’ésitu d’esti festival celebráu en Tapia.

Prósima edición
Dende la Banda de Gaitas Occidente, organizadora del eventu, yá entamaron colos preparativos pa la XV edición. Va tornar la tradicional “Noite Máxica” y bandes de Bretaña, Galicia y Mallorca confirmaron la so presencia pal 2011, un añu que la organización nagua por que sea el meyor de la historia del festival.