Les Cámares d'Asturies y Cantabria xúntense pa esixir finar l'Autovía del Cantábricu

Los presidentes de les Cámares de Comerciu d'Asturies y de Cantabria alcordaron xunise pa esixir que finen l'Autovía del Cantábricu, nos tramos Unquera-Llanes y Solares-Torrelavega.

Asina tamién, refugaron la xubída d'impuestos y l'aplicación de la euroviñeta a los tresportistes, al tiempu que reclamen plazos de llegada del AVE a les respectives comunidaes.
  
Nesti sen, el presidente la Cámara d'Uviéu, Severino García Vigón, al mesmu tiempu responsable la Federación Asturiana d'Empresarios (FADE), esplicó, nuna rueda de prensa dempués de la reunión mantenida na sede cameral xixonesa, que les cinco cámares, yá que va sumase a la iniciativa la de Torrelavega, tienen intereses comunes en que se finen los citaos tramos por ser necesarios y por tar comprometíos, y dalgunos incluso en execución.
  
Al respecto, indicó que nel casu de Solares-Torrelavega, ye un tramu llicitáu y n'execución, nel que'l contratu foi rescindíu col axuste de Fomentu, anque apuntó que paez qu'hai la promesa de tornar a facelo baxo un réximen concesional. "Tenemos munchu interés en que'l tramu se solucione", indicó enantes d'avisar sobre que la paralización d'obres xubirá'l desemplegu.
  
Tamién reclamó feches pa la llegada del AVE y amosó'l refugue de les Cámares asturianes y cántabres a la xubida d'impuestos, al nun ser bona y nun sofitar "nada" la recuperación económica.
  
Vigón alvirtió, amás, que la diferenciación d'impuestos nes estremaes comunidaes pue perxudicar a la competitividá de les empreses y refugaron el llante de la euroviñeta. Frente a esto,sorrayó l'aciertu de la fusión de caxes na que participen Caxastur y Caxa Cantabria que, al so xuiciu, reforzará les dos instituciones.
  
Entrugáu pola rempuesta del conseyeru d'Infraestructures, Francisco González Buendía, a la petición de CAC-ASprocon pa que tengan más briu na so protesta al Gobiernu central polos recortes de Fomentu qu'afectan a la rexón, señaló que se fía de que lo van facer y lo tan faciendo. "El Gobiernu debe ser Gobiernu hasta l'últimu día", recordo-y al Principáu.
  
Pola so parte, el presidente la Cámara de Cantabria, Modesto Piñeiro, revindicó la execución del tramu Solares-Torrelavega, pa que les empreses nun pierdan tiempu nin competitividá.
  
Respecto al AVE, dixo que n'Asturies el proyectu ta más desendolcáu, pero en Cantabria viose afectáu abondo pol recorte de Fomentu. Pero, apuntó qu'hai un protocolu pa tornar a facer los tramos dende Castiella y Lleón  y el trazáu dende Reinosa a Santander. Nesti caberu casu, llamentó que lo que se va facer ye una meyora la llinia d'anguaño, que ye "del sieglu XIX", polo que ye "abondo deficiente y nun sedrá d'AVE", criticó.
  
Pa Piñeiro ye perimportante que se torne a facer les obres, anque seya baxo concesión, ya qu'en dellos casos pue llegar a perdese'l trabayu fechu si nun s'entaman enantes del iviernu, por culpa los desmontes.
  
Tamién aneció en que nun ye'l momentu de más y mayores impuestos, ye'l de trabayar pola productividá en llugar de penalizar el costu de les materies primes, el consumu y en concretu l'actividá económica. Sobre la euroviñeta,enfatizar que'l sector del tresporte "yá ta perpenalizáu" como p'añadir un nuevu impuestu.